ანაკლიის პორტის პროექტით უმსხვილესი ტრანსნაციონალური კომპანიები დაინტერესდნენ. "თიბისი ბანკის" ინფორმაციით, ეს დაინტერესება "ანაკლიის განვითარების კონსორციუმის" წარმომადგენელთა ჩინეთში ვიზიტს მოჰყვა. მათივე ცნობით, "თიბისი ჯგუფის" ხელმძღვანელი მამუკა ხაზარაძე, ამერიკელ პარტნიორებთან ერთად, კომპანიების - COSCO Pacific-ის, TEDA-სა და ჩინეთის განვითარების ბანკის ხელმძღვანელებს შეხვდა. COSCO Pacific მსოფლიოში სიდიდით მეოთხე პორტ-ოპერატორია, რომელსაც გლობალური ბაზრის 9% უჭირავს. TEDA - ეს არის უმსხვილესი თავისუფალი სავაჭრო-ტექნოლოგიური და ინდუსტრიული ზონა, რომელიც ჩინეთის ეკონომიკის ერთ-ერთი მამოძრავებელი პროექტია. რაც შეეხება ჩინეთის განვითარების ბანკს, ეს არის მულტიმილიარდიანი სახელმწიფო ბანკი. კომპანიები მზად არიან განიხილონ ანაკლიის პროექტში პარტნიორობის საკითხები. უახლოეს მომავალში მათი წარმომადგენლები საქართველოშიც ჩამოვლენ და ადგილზე შეისწავლიან პორტის განვითარების შესაძლებლობებს. "ძალიან წარმატებული ვიზიტი იყო. ამ კომპანიებს არა მხოლოდ შეუძლიათ საკუთარი გამოცდილების საქართველოში ჩამოტანა, არამედ მზად არიან, განიხილონ ინვესტიციის ჩადების საკითხი და ასევე მოიზიდონ მომავალში ჩინური საწარმოები, რომლებიც შესაძლოა განთავსდნენ ანაკლიის თავისუფალ ინდუსტრიულ და სავაჭრო ზონაში. რაც შეეხება ჩინეთის განვითარების ბანკს, სახელმწიფოს ეკონომიკური პოლიტიკიდან გამომდინარე, ის პირდაპირ არის დაინტერესებული აბრეშუმის გზის განვითარებით. შეთანხმება იმის შესახებ, რომ ჩინეთის განვითარების ბანკი დაიწყებს პროექტის დაფინანსების განხილვას, უკვე დიდი წარმატებაა ჩვენთვის", - განაცხადა მამუკა ხაზარაძემ. "ანაკლიის განვითარების კონსორციუმი", რომელიც აერთიანებს "თიბისი ჰოლდინგსა" და "კონტი ჯგუფს" ანაკლის პორტის განვითარების პროექტზე გამოცხადებული ტენდერის ბოლო ეტაპზე მონაწილეობს.