ავსტრალიის ხელისუფლება ჰოლივუდის მსახიობს ჯონი დეპს 10-წლიანი პატიმრობით ემუქრება. მსახიობს ქვეყანაში ძაღლების კონტრაბანდური გზით შეყვანასა და კარანტინთან დაკავშირებული კანონების დარღვევაში ედავებიან. როგორც The Sydney Morning Herald-ი იტყობინება, ჯონი დეპს ასევე ემუქრება 270 ათასი დოლარის ჯარიმის გადახდაც. შესაბამისი წინადადება ქვეყნის სენატში სხდომის მიმდინარეობისას გაჟღერდა. ამის გარდა შესაძლოა ორწლიანი პატიმრობა მიესაჯოს მსახიობის პილოტსაც, რომელმაც ხელისუფლების წარმომადგენლების აზრით, ჯონი დეპს ცხოველების შეყვანაში დაეხმარა. როგორც გამოცემა აღნიშნავს, მთავრობის განცხადების შემდეგ დეპმა თავის ცოლთან ემბერ ჰერდთან ერთად ავსტრალია სასწრაფოდ დატოვა. ჯონი დეპი ავსტრალიაში „კარიბის ზღვის მეკობრეების“ მეხუთე ნაწილის გადაღებებზე იმყოფებოდა. გადამღები ჯგუფის წარმომადგენელმა მაიკლ სინგერმა განაცხადა, რომ დეპის გამგზავრება მანამდე იყო დაგეგმილი და ის სენატის განცხადებას არანაიარად არ უკავშირდება. სინგერის თქმით, ლოს-ანჯელესში მსახიობი ქალიშვილის ლილი-როუზის დაბადების დღისთვის გაემგზავრა. სინგერისვე თქმით, დეპის არყოფნა „კარიბის ზღვის მეკობრეების“ გამოსვლის გრაფიკზე არ იმოქმედებს. გადამღები ჯგუფი იმ სცენებს გადაიღებს, რომელშიც მსახიობი არ მონაწილეობს. სინგერს არ დაუზუსტებია თუ როდის დაბრუნდება ავსტრალიაში ჯეკ ბეღურას როლის შემსრულებელი. ფილმის მეხუთე ნაწილის გამოსვლა 2017 წლის 7 ივლისაა დაგეგმილი. სურათის წინა ოთხმა სერიამ მსოფლიო მასშტაბით 3,73 მლრდ დოლარის შემოსავალი მიიღო.