სოციალურ ქსელ ფეისბუკში გავრცელებული ინფორმაციის მიხედვით, საფეხბურთო კლუბის  ზუგდიდის „ზუგდიდი“ ფეხბურთელებმა თბილისის „დინამოსთან“ 7-0 წაგების სანაცვლოდ ფული აიღეს. ს/კ „ზუგდიდის“ გულშემატკივარი და ყოფილი პარლამენტარი გურამ (ცაცა) შელია ფეისბუკის საკუთარ გვერდზე წერს, რომ კლუბის დირექტორმა გელა ინალიშვილმა  თამაშის „გაყიდვაში“ მონაწილე 10 ფეხბურთელი გუნდიდან  გაუშვა. „1990 წლის 27 მაისს დიდი ფეხბურთიდან გააცილეს ლეგენდარული ქართველი მეკარე ოთარ გაბელია, ზუგდიდის ფუხბურთის ისტორიაში საუკეთესო, ჯენტლმენი, კოლორიტი, უპატიოსნესი კაცი, ის თვით ზ. გამსახურდიამ გააცილა დინამოს სტადიონიდან, ამას იმიტომ ვწერ რომ დღევანდელმა ზუგდიდის ფეხბურთელებმა არაკაცობა, ჩ........ბა, ბ.......ა, გამყიდველობა ჩაიდინეს. მათ ვიღაცამ უთხრა წააგებთ 7-0 მიიღებთ ფულს, ტოტალიზატორში დადო ვიღაცამ დიდი თანხა, ჩვენმა გამყიდველებმა კი შეასრულეს, ის კი არა და როცა ბ. შეროზიამ შეცვლაზე ახალი ფეხბურთელი შეიყვანა, მისთვის არ იყო ნათქვამი რომ უნდა წაეგოთ ამ ანგარიშით, იმანაც ერთხელ ძელს მოარტყა, მერე პენალტი გააკეთა.  პენალტი ჩვენებმა ოსტატურად ააცილეს კარს, აბა ხომ არ გაიტანდნენ?! შეცვლაზე შემოსულ ფეხბურთელს ეგრევე უთხრეს ვაი ფეხბურთელებმა ფულს გვაძლევენ შენ შენსას მიიღებო, ისიც გაჩერდა.  დინამოს 3 თვის ხელფასი არ აუღია, ასეა სხვა გუნდებიც, ზუგდიდი კი ყოველთვიურად დათქმულ დროს იღებს ფულს ქალაქის მერის გოგოხიას ძალისხმევით.  გ. ინალიშვილმა, ვინც მონაწილეობდა ამ გაყიდვებში ის 10 ფეხბურთელი გაუშვა“, - წერს ფეისბუკზე გურამ შელია. საფეხბურთო კლუბ ზუგდიდის „ზუგდიდი“ დირექტორი გელა ინალიშვილი გავრცელებულ ინფორმაციას არ ადასტურებს და აცხადებს, რომ ფეხბურთელები გუნდიდან მხოლოდ კონტრაქტის დასრულების გამო გაუშვეს.   „მაისში ყველა ფეხბურთელს ამოეწურა კონტრაქტის ვადა და ყველა წავიდა. კლუბის გაახალგაზრდავებაზე ვფიქრობთ...  გუნდის ყოფილი ფეხბურთელებიდან მხოლოდ 4-თან მიმდინარეობს მოლაპარაკება.  20 ივნისს გაირკვევა ყველაფერი თუ ვინ დარჩება გუნდში.  რაც შეეხება გავრცელებულ ინფორმაციას, ჭორებზე ვერ ვისაუბრებ,  ეს უკვე სხვა უწყების გამოსაკვლევია".- თქვა რადიო „ათინათთან“ საუბარსას გელა ინალიშვილმა. საფეხბურთო კლუბ ზუგდიდის „ზუგდიდს“  თბილისის „დინამომ“ დინამო არენაზე 13 მაისს უმასპინძლა. ანგარიში დინამოს სასარგებლოდ 7:0 დასრულდა.