ცნობილმა ესპანელმა მომღერალმა ენრიკე იგლესიასმა ხელის ტრავმა მიიღო მექსიკის ქალაქ ტიხუანაში კონცერტის მსვლელობისას. ამის შესახებ მექსიკური პორტალი La Razon-იტყობინება. თვითმხილველთა თქმით, გამოსვლისას მომღერალი შეეცადა ხელით დაეჭირა მცირე ზომის მართვადი საფრენი აპარატი, რომელიც კონცერტის გადაღებისთვის გამოიყენება. იგლესიასს მაყურებლებისთვის ფოტოსურათის გადაღების მიზნით ეს ადრეც გაუკეთებია, თუმცა ამ ჯერზე არ გაუმართლა: მარჯვენა ხელის რამდენიმე თითი ღრმად გაეჭრა და სისხლდენა დაეწყო. ამის მიუხედავად, იგლესიასმა კონცერტი განაგრძო, სისხლდენა შეჩერდა, თუმცა თანაშემწეები ენრიკეს კონცერტის შეწყვეტას ურჩევდნენ. მაყურებლებმა სოციალურ ქსელებში უკვე გამოაქვეყნეს ფოტოსურათი, რომელზეც კარგად ჩანს იგლესიასის დასისხლიანებული მაისური და დოლბანდით შეხვეული ხელი. კონცერტის დასრულების შემდეგ ენრიკე ლოს-ანჯელესში გაემგზავრა, სადაც ის ექიმებმა გასინჯეს. ამჟამად მომღერალი ტრავმის შემდეგ რეაბილიტაციის პერიოდს გადის და ისვენებს.