30 ივლისიდან 7 აგვისტოს ჩათვლით ანაკლიაში GEM Fest გაიმართება.ორგანიზატორების თქმით, GEM Fest ითვალისწინებს მომხმარებლების შარშანდელ პრეტენზიებს და წელს ფასებისადმი დამოკიდებულება შეიცვლება. მათი თქმით, ფესტივალის ტერიტორიაზე დემოკრატიული ფასები იქნება, რომელიც არ განსხვავდება ქართულ გასართობ ინდუსტრიაში დამკვიდრებული ფასებისგან. რაც შეეხება ბილეთებს: ისინი გაყიდვაში ორშაბათიდან, 15 ივნისიდან ჩაეშვება და პირველ ათას მყიდველს საშუალება ექნება ცხრადღიანი ფესტივალის აბონიმენტი 99 ლარად შეიძინოს. უკვე შემდეგ ფასები ეტაპობრივად გაიზრდება,მაგრამ არა ისე,რომ ქართულ რეალობაში მათი შეძენა შეუძლებელი გახდეს. ე.წ. „მულტი პასის“ რამდენიმე ვერსია არსებობს: მხოლოდ შესვლა-გამოსვლის უფლების მქონე, 2 პირზე გათვლილი კარავით და „დაიმონდ პასი“, რომლის მფლობელსაც დამატებითი მომსახურებით სარგებლობის საშუალება ექნება. ფესტივალზე შესვლის მსურველებს ასევე შეეძლებათ ადგილზე შეიძინონ ერთჯერადი ბილეთები. მათი ღირებულება იმ დღეს მონაწილე არტისტების მიხედვით განისაზღვრება. GEM Fest 18 ჰექტარ ტერიტორიაზე 4 სცენით 24 საათიანი რეჟიმით იმუშავებს. დამატებითი ინფორმაციისთვის შეგიძლიათ ფესტივალის ოფიციალურ გვერდს www.gem-fest.com ეწვიოთ.