ქალაქ ზუგდიდის საკრებულოს დღევანდელ სხდომაზე დეპუტატმა თენგიზ ქოჩუამ ჟურნალისტებს მიმართა და სთხოვა გავრცელებინათ ინფორმაცია, რომ კომუნალური გადასახდები არ გაძვირებულა. მისივე ინფორმაციით, გადასახადებზე მომსახურება ბანკების ნაწილმა გააძვირა და მათ გადაწყვეტილებაში  თვითმართველობა ვერ ჩაერევა. ამასთან, დეპუტატმა მოსახლეობას მოუწოდა კომუნალური გადასახადები ე.წ. სწრაფი გადახდის აპარატების საშუალებით  გადაიხადონ, რადგან აქ მომსახურეობის თანხა უცვლელი დარჩა. „უკმაყოფილო მოსახლეობამ მოგვაწოდა ინფორმაცია, რომ კომუნალური გადასახადები გაიზარდა. მინდა მოსახლეობას ვუთხრა, რომ ეს მცდარი ინფორმაციაა და მომსახურება ბანკებმა გააძვირეს“, - თქვა თენგიზ ქოჩუამ. მისივე ინფორმაციით, ბანკებმა მომსახურეობა ერთ ტრანზაქციაზე 75 თეთრამდე გაზარდა.