რეჟისორი ვახტანგ ვარაზი მის ახალ სრულმეტრაჟიან დოკუმენტურ ფილმზე მუშაობს. ეს არის ერთი გემის ისტორია, რომელმაც თავის დროზე მრავალი ადამიანის სიცოცხლე იხსნა. 20 წლის შემდეგ აფხაზეთში დაბრუნების იმედი ბევრმა დევნილმა დაკარგა, მაგრამ ვახო და ლადო მაინც აგრძელებენ სახლში დაბრუნებაზე ოცნებას. ვახო გემი „ენგურის" ბოცმანია, ლადო კი კაპიტანი. ისინი „ენგურს" თითქმის არასდროს ტოვებენ და მასთან ერთად ბერდებიან. ლადოს გული აწუხებს, ვახოს - კუჭი, გემს კი ჟანგი. თუ ვახო და ლადო გემის შესაკეთებლად თანხას ვერ იშოვნიან, შესაძლოა „ენგურმა" მორიგ ზამთარს ვერ გაუძლოს და ბოლო გადარჩენილი გემიც დავიწყებას მიეცეს. ფილმი „დევნილი გემი ენგური" ამჟამად სამონტაჟო პერიოდშია და მასზე მუშაობა მალე დასრულდება. ავტორი: საქართველოს კინემატოგრაფიის ეროვნული ცენტრი