ზუგდიდში სამაუწყებლო კომპანია „რუსთავი 2“ – ის მხარდასაჭერი მშვიდობიანი აქცია გაიმართა, რომელიც „სამეგრელოს განვითარების ცენტრის“ ორგანიზებით მოეწყო. ცენტრის მოხალისე მოსწავლეებმა ორგანიზაციის წინ ასფალტზე „რუსთავი 2“ – ის ლოგო გამოსახეს, ხელში კი ტრანსპარანტები ეჭირათ ტექსტით – “შორს ხელები „რუსთავი 2“ - გან. სამეგრელოს განვითარების ცენტრის ხელმძღვანელის ანა წითლიძის თქმით, ეს არის კონკრეტული მედიის მხარდასაჭერი აქცია პრორუსული ოლიგარქი ივანიშვილის წინააღმდეგ, „რომელსაც ახლა ყელში გაეჩხირა „რუსთავი 2“ და რომელსაც უნდა, რომ სიტყვის თავისუფლება წაართვას ქართველ ხალხს. ყოველთვის დავიცავთ სიტყვის თავისუფლებას და იმ „რუსთავი 2“- ს, რომელიც აგვისტოს ყველაზე მძიმე დღეებში სახელმწიფოებრივი ინტერესების სადარაჯოზე იდგა,“ – განაცხადა ანი წითლიძემ. „ეს ჩვენი ტელევიზიაა და გვინდა, რომ ბოლომდე დემოკრატიული და თავისუფალი იყოს. ის ორი ათეული წელია ქართველ ხალხს ემსახურება და ჩვენ ვიმედოვნებთ, რომ ჩვენ გავიმარჯვებთ და „რუსთავი 2“ ისევ დარჩება ქართველი ერისა და ხალხის გვერდზე“, – თქვა ცენტრის წარმომადგენელმა დიმიტრი ხურციამ.

რუსთავი 2-ის წილების დასაბრუნებლად გასულ კვირას ბიზნესმენმა ქიბარ ხალვაშმა საქალაქო სასამართლოში სარჩელი შეიტანა, რომლის საფუძველზე სასამართლომ ტელეკომპანიის ავტომობილები დააყადაღა და იმავე დღეს, ყადაღა სამაუწყებლო კომპანიის მთლიან ქონებას დაადო. ტელეკომპანიის მხარდასაჭერად საქართველოს მასშტაბით აქციები იმართება, რომელსაც საზოგადოების ცნობილი სახეები უერთდებიან.