ზუგდიდის მუნიციპალიტეტის სოფელ ნარაზენში, შამადელას უბნის მოსახლეობამ საპროტესტო აქცია გამართა. ისინი საავტომობილო გზის რეაბილიტაციას, ინდივიდუალურ გამრიცხველიანებას, ელექტრო გადამცემი ბოძების განახლებას და სკოლის რეაბილიტაციას ითხოვენ. აქციაზე, დაახლოებით, 50-მდე ადგილობრივი იმყოფებოდა. გარდა ამისა, შამადელას უბნის მოსახლეობა სასმელი წყლის პრობლემაზეც საუბრობს. მათი თქმით, დაზიანებული წყლის გენერატორის შესაკეთებლად შამადელას რწმუნებულს მიმართეს, თუმცა უშედეგოდ. ასევე, შამადელას უბნის მოსახლეობის განმრტებით, მათი უბნის სკოლაში სწავლა მხოლოდ მეოთხე კლასამდეა შესაძლებელი, თუმცა ეს შენობაც დაზიანებულია. მათივე თქმით, სკოლის შენობას ჩამსხვრეული აქვს ფანჯრები, დაზიანებულია სახურავი, იატაკი და ამის გამო უარს ამბობენ სკოლაში ბავშვების მიყვანაზე. მათ უახლოეს სასწავლო დაწესებულებამდე კი, დაახლოებით, 4 კილომეტრის გავლა უხდებათ. ზუგდიდის მუნიციპალიტეტის გამგეობის საზოგადოებასთან და მედიასთან ურთიერთობის სამსახურის უფროსის მაია ღურწკაიას თქმით, შამადელას ადმინისტრაციულ ერთეულში ინფრასტრუქტურული სამუშაოები უახლოეს პერიოდში დაიწყება. მისივე თქმით, შამადელას მოსახლეობას წყლის პრობლემა რეალურად ორი დღის წინ შეექმნა. რაც შეეხება, ინდივიდუალურ გამრიცხველიანებას, „ენერგო პრო ჯორჯიაში“ აცხადებენ, რომ ეს პროცესი სოფელ შამადელაში წელს ვერ დაიწყება. ზუგდიდის რესურსცენტრის ხელმძღვანელის გონერ პაპავას განცხადებით, შამადელას სკოლაში არსებული პრობლემა მათთვის ცნობილია და განათლებისა და მეცნიერების სამინისტრო სკოლის შენობის სარემონტო სამუშაოების დაწყებას უახლოეს მომავალში გეგმავს.