გერმანიის ელჩმა ბეტინა კადენბახმა ქუთაისში დევნილთა დასახლებაში პროექტის - „იძულებით გადადგილებულ პირთა თემების სოციალურ-ეკონომიკური ინტეგრაციისთვის თანმხლები ზომების გატარება“  - ფარგლებში აშენებული ოფისი დაათვალიერა. გარდა ამისა, ელჩმა ახლადაშენებული კორპუსები მოინახულა. ის დევნილების საცხოვრებელი გარემო პირობებით კმაყოფილი დარჩა. ზემოაღნიშნული პროექტის მიზანია დასახლებაში მცხოვრები ელექტრიკოსებისა და სანტექნიკოსების გადამზადება.  გადამზადებული კადრები ვალდებულნი იქნებიან ახლადაშენებულ კორპუსებში უზრუნველყონ ცენტრალური გაყვანილობების გამართულად ფუნქციონირება. ასევე,  მათ უფლება ექნებათ მოემსახურონ კერძო პირებს და დამატებითი შემოსავლის წყაროები გაიჩინონ. პროექტის ფარგლებში, დევნილების მონაწილეობით, შეიქმნა არასამთავრობო ორგანიზაციები და არჩეულ იქნა გამგეობის თავჯდომარე. ქუთაისის გარდა, პროექტი წყალტუბოში, ფოთსა და ზუგდიდის დევნილთა დასახლებში მოქმედებს. მას ასოციაცია „ათინათი“,  გერმანიის რეკონსტრუქციისა და განვითარების ბანკის და საქართველოს მუნიციპალური განვითარების ფონდის მხარდაჭერით, ახორციელებს. ცნობისთვის, საქართველოს რეგიონული განვითარებისა და ინფრასტრუქტურის სამინისტროს სსიპ მუნიციპალური განვითარების ფონდმა, გერმანიის რეკონსტრუქციისა და განვითარების საკრედიტო ბანკის დაფინასებით, ქუთაისში, ზუგდიდში, წყალტუბოსა და ფოთში დევნილებისთვის  საცხოვრებელი კორპუსები ააშენა.