საქართველოს ყოფილი მთავარი პროკურორის, მურთაზ ზოდელავას პირველი მოადგილე დავით ჩხატარაშვილი სამსახურებრივი უფლებამოსილების ბოროტად გამოყენების ბრალდებით დააკავეს. ამის შესახებ გუშინ გამართულ პრესკონფერენციაზე პროკურატურის წარმომადგენელმა დავით კვინიკაძემ განაცხადა. "პროკურატურამ ბრალდებულის სახით დააკავა მთავარი პროკურორის ყოფილი პირველი მოადგილე დავით ჩხატარაშვილი. მას ბრალად ედება უფლებამოსილების ბოროტად გამოყენება, მძიმე და განსაკუთრებით მძიმე დანაშაულის შესახებ სისხლის სამართლის საქმის ორგანიზება. გამოძიებამ დაადგინა, რომ 2012 წლის სექტემბრის თვეში იუსტიციის ყოფილმა მინისტრმა ზურაბ ადეიშვილმა და მთავარი პროკურორის ყოფილმა პირველმა მოადგილემ დავთ ჩატარაშვილმა შეიტყვეს, რომ სასჯელაღსრულების N8 დაწესებულებაში გადაღებული იყო პატიმრების ცემისა და წამების ფაქტების ვიდეომასალა. იუსტიციის ყოფილმა მინისტრმა და დავით ჩხატარაშვილმა სასჯელაღსრულების დაწესებულებაში სხვადასხვა მაღალჩინოსნებთან ერთად დაგეგმეს და განახორციელეს ამავე სასჯელაღსრულების დაწესებულებაში რამდენიმე პატიმრის დამცირება, რაც მიზნად ისახავდა საზოგადოებისთვის ცრუ ინფორმაციის მიწოდებას თითქოსდა სახელმწიფოს საგამოძიებო სტრუქტურებმა დროულად გამოავლინეს პატმრების ცემისა და შეურაცხყოფის ფაქტები. სწორედ დავით ჩატარაშვილის ორგანიზებითა და დახმარებით განხორციელდა პატიმრების დამცირება. გრძელდება გამოძიება სხვა პირების დასადგენად", - განაცხადა დავით კვინიკაძემ.