ეს არ იყო დამოუკიდებელი სასამართლოს გადაწყვეტილება, - ასე აფასებს არასამთავრობო ორგანიზაცია "სამართლიანი არჩევნების" აღმასრულებელი დირექტორი ნინო ლომჯარია გიგი უგულავასთვის თბილისის მერის უფლებამოსილების შეწყვეტასთან დაკავშირებით თბილისის საქალაქო სასამართლოს გადაწყვეტილებას. როგორც ლომჯარიამ განაცხადა, სასამართლოს გადაწყვეტილების შეფასება ძალიან რთულია, რადგან გადაწყვეტილება ზეპირი მოსმენის გარეშეა მიღებული და უცნობია, რა იყო პროკურატურის მოთხოვნა და რა მტკიცებულებები და მოტივაცია გაითვალისწინა სასამართლომ. "ამ საქმის მიმართ ძალიან მაღალი საზოგადოებრივი ინტერესი არსებობს. ასევე საერთაშიროსო ორგანიზაციების მხრიდან ძალიან დიდი დაინტერესება არსებობს ზოგადად ამ ტიპის საქმეების მიმართ, როდესაც პოლიტიკური თანამდებობის პირის მიმართ არის საქმე და ვფიქრობ, ასეთ დროს სასამართლომ მაქსიმალური გამჭვირვალობის სტანდარტით უნდა იხელმძღვანელოს. ამ შემთხვევაში ჰქონდა სასამართლოს საკმარისი საფუძველი იმისთვის, რომ ზეპირი მოსმენით და მხარეთა მონაწილეობით განეხილა ეს გადაწყვეტილება, თუმცა სამწუხაროდ ეს ასე არ მოხდა", - აცხადებს ლომჯარია. მისივე თქმით, სამართლებრივად აქვს სასამართლოს უფლება, ზეპირი მოსმენის გარეშე მიიღოს გადაწყვეტილება, თუმცა, როდესაც საკითხი უფლებამოსილებას ეხება, სასამართლომ საზოგადოებრივი ინტერესებით უნდა იხელმძღვანელოს. "სამწუხაროდ, მაინც ვფიქრობ, რომ როდესაც სასამართლომ ფარულად მიიღო გადაწყვეტილება, ამ შემთხვევაში ეს არ იყო დამოუკიდებელი სასამართლოს გადაწყვეტილება. მე ვფიქრობ, რომ გარკვეულმა პოლიტიკურმა მოტივებმა მის გადაწყვეტილებაზე ალბათ ითამაშეს, სხვა მხრივ ვფიქრობ, სასამართლო რომ სრულიად დამოუკიდებელი იყოს და მას გარე ფაქტორების არ ეშინოდეს, ასეთ სიტუაციაში სხვანაირ გადაწყვეტილებას მიიღებდა", - მიაჩნია ლომჯარიას.