საქართველოს თავდაცვის ყოფილი მინისტრის ბაჩო ახალაიას მეუღლე ანი ნადარეიშვილი მთავარ პროკურატურაში ახსნა-განმარტების მისაცემად მივა. როგორც ანი ნადარეიშვილმა  განაცხადა, საქმე ეხება შალვა თათუხაშვილის გარდაცვალებას და პროკურატურის თანამშრომლებთან დაკავშირებით მის მიერ გაკეთებულ განცხადებებს. "თბილისის პროკურატურის გამომძიებლები დავით ძნელაშვილი და გურგენ გილაური ვამხილე. შალვა თათუხაშვილმა გარდაცვალებამდე ადვოკატებს და ოჯახის წევრებს მოუთხრო, რომ ამ ადამიანებმა გაიტაცეს, ჰყავდათ კონსპირაციულ ბინაში, აწამებდნენ, თავს აყოფინებდნენ ცივ წყალში, ყურთან ახდენდნენ გასროლას, ეუბნებოდნენ, რომ სკოლიდან მომავალ მის მცირეწლოვან შვილს შემთხვევით გაიტანდა მანქანა, მკვლელს საპროცესოთი დიდი სიამოვნებით გამოუშვებდა პროკურატურა, რადგან ვითომ უბედური შემთხვევა იყო. ამ ყველაფერს ჩაწერდნენ და აყურებინებდნენ. ამ ყველაფრის შემდეგ, როგორც ჩანს, ეს ადამიანი იქ გაუხდათ ცუდად და მოიყვანეს სასწრაფოდ სახლში", - აღნიშნა ანი ნადარეიშვილმა. მისივე თქმით, შალვა თათუხაშვილმა ყოველივე ეს მოუყვა ოჯახის წევრებს, ადვოკატებს და იმავე ღამეს გარდაიცვალა. როგორც ანი ნადარეიშვილი განმარტავს, ამასთან დაკავშირებით მან გუშინ პრესკონფერენცია გამართა, რის შემდეგაც მას პროკურატურიდან დაუკავშირდნენ და ახსნა-განმარტების მისაცემად დაიბარეს.