საქართველოს ყოფილი პრეზიდენტი, მიხეილ სააკაშვილი აცხადებს, რომ მისი დაკითხვა ისეთ საკითხებზე სურთ, რომელსაც სამართლებრივ პროცედურებთან საერთო არაფერი აქვს. ამის შესახებ მიხეილ სააკაშვილმა რუსულ "ბიბისისთან" ინტერვიუში განაცხადა. ჟურნალისტის კითხვაზე, რამდენადაც მას ესმის, საუბარია ზურაბ ჟვანიას მკვლელობაზე, მიხეილ სააკაშვილმა განაცხადა, რომ საქმე ეხება არა მკვლელობას, არამედ გარემოებას, რომელიც ყოფილი პრემიერ-მინისტრის ტრაგიკულად გარდაცვალებას უკავშირდება. "ჯერ ერთი, არავითარი მკვლელობა არ ყოფილა და მათ ეს ძალიან კარგად იციან ", -განაცხადა მიხეილ სააკაშვილმა. მიხეილ სააკაშვილმა ისაუბრა იმაზეც, თუ რატომ აცხადებს უარს "სკაიპით" დაკითხვაზე. როგორც მან აღნიშნა, ამის მიზეზი არის ის, რომ ამ ყველაფერს სამართლებრივ პროცესთან საერთო არაფერი აქვს და პროცესები პოლიტიკურია. "საქართელოს ხელისუფლებას არ შეუძლია ოპოზიციასთან პოლიტიკური გზით საუბარი და მათ მხოლოდ პროკურატურის ენით საუბარი შეუძლიათ. ისინი ისევე იქცევიან, როგორც იანუკოვიჩი იქცეოდა, თუმცა, ზოგჯერ იანუკოვიჩი უფრო დემოკრატიულად იქცეოდა, რადგან მან რამდენჯერმე ოპოზიცია თავისთან მიიღო. საქართველოს ხელისუფლება კი ოპოზიციას მხოლოდ პროკურორის კაბინეტში იღებს", - განაცხადა სააკაშვილმა.