რუსეთის სახელმწიფო სათათბირომ დაამტკიცა ახალი მკაცრი შეზღუდვები სოციალური ქსელებისთვის და ბლოგერებისთვის. დეპუტატებმა 22 აპრილს მესამე და საბოლოო მოსმენით მიიღეს ახალი „ანტიტერორისტული“ პაკეტი, რომელიც ელექტრონული შეტყობინებების გადამცემ კომპანიებს, მათ შორის გუგლის მსგავს უცხოურ ფირმებს, ავალდებულებს რეგისტრაცია გაიარონ კომუნიკაციის სახელმწიფო უწყებებში. ახალი კანონის თანახმად, ამ კომპანიებმა მათი საიტის მეშვეობით გადაცემულ ყველა შეტყობინებაზე ინფორმაცია ექვსი თვის განმავლობაში უნდა შეინახონ ინტერნეტ პროვაიდერზე, რომელიც რუსეთის ტერიტორიაზე იქნება განთავსებული. ამავე კანონის სხვა ნაწილის თანახმად, ბლოგერებმა, რომელთა პირად ვებსაიტებს ან სოციალური ქსელების გვერდებს დღეში 3000 ან მეტი მნახველი ჰყავს, ოფიციალურ უწყებებს უნდა შეატყობინონ თავიანთი გვარი და იმეილის მისამართი.  ამასთან, ბლოგერები უნდა დაემორჩილონ კანონებს, რომლებიც მას მედიას ეხება - მათ შორის ცილისწამების, ექსტრემიზმის ან გამოქვეყნებული ინფორმაციის სისწორის საკითხებში. ამ წესების დარღვევის პირველი შემთხვევისთვის დაწესებული ჯარიმა ათას ამერიკულ დოლარამდეა.