ყვარლის უკვე ყოფილ გამგებელ დავით ქევხიშვილს გურჯაანის რაიონულმა სასამართლომ 100 ლარიანი ჯარიმა შეუფარდა. მასთან ერთად დაკავებულ 17 პირს კი 400-400 ლარის გადახდა დაეკისრა. პროცესი 8 საათის განმავლობაში მიმდინარეობდა. ქევხიშვილი გუშინ წვრილმანი ხულიგნობის ბრალდებით დააკავეს. მას ბრალი საქართველოს ადმინისტრაციულ სამართალდარღვევათა კოდექსის 166-ე მუხლით ედება. აღნიშნული პირების დაკავება გუშინ მომხდარ ინციდენტს მოჰყვა, როდესაც ყვარლის გამგებლის, დავით ქევხიშვილის მხარდამჭერები საკრებულოს წევრ თამაზ გუგუშვილს სიტყვიერად დაუპირისპირდნენ და კვერცხები ესროლეს. ქევხიშვილისა და 17 პირის დაკავების მიზეზებზე რამდენიმე ვერსია გავრცელდა. ერთ-ერთი ვერსიით, დავით ქევხიშვილი და მისი მომხრეები "ნაციონალური მოძრაობის" წევრს დაუპირისპირდნენ და კვერცხები ესროლეს, მეორე ვერსიით კი, ქევხიშვილის თანამდებობიდან მოხსნით შს მინისტრის მოადგილე გიორგი ზედელაშვილია დაინტერესებული. ამასთან, საკრებულომ ქევხიშვილს გმაგებლის უფლებამოსილება შეუჩერა.