"ქართული ოცნების" შტაბს დისციპლინა აკლია, - ამის შესახებ საქართველოს ყოფილმა პრემიერ-მინისტრმა ბიძინა ივანიშვილმა მარნეულის გამგებლობის ყოფილ კანდიდატთან დაკავშირებით განაცხადა. "დისციპლინა აკლია "ქართული ოცნების" შტაბს, თუმცაღა ესეც დემოკრატიულობაა. ასე გადაწყვიტა შტაბმა და ესეც ნორმალურია. ესეც მაჩვენებელია თუ გნებავთ იმის, რომ ჩვენს ქვეყანში დემოკრატიაა", - აღნიშნა ნატანებში 61-ე უბანზე ხმის მიცემის შემდეგ ორგანიზაცია "მოქალაქეს" დამფუძნებელმა. მისივე თქმით, მარნეულის შემთხვევებზე არის კითხვის ნიშნები დაწყებული იქედან, როცა "ნაციონალური მოძრაობის" კანდიდატურას ხსნიდნენ. "მადლობა ღმერთს, რომ სასამართლომ დამოუკიდებლობა აჩვენა. მეც მქონდა შეკითხვები არ დაგიმალავთ. არ მქონდა დიდი კმაყოფილება მაგრამ ყველაფერი დალაგდა. არ არსებობს ხელისუფლება და არ არსებობს მთავრობა, რომელსაც შეცდომები არ მოსდის. მაგრამ არ უნდა მოსდიოდეს დიდი შეცდომები და ეს არ უნდა იყოს კატასტროფა", - განაცხადა საქართველოს ყოფილმა პრემიერმა. მარნეულში კოალიცია "ქართულმა ოცნებამ" გამგებლობის კანდიდატი ოპოზიციის სასარგებლოდ მოხსნა, თუმცა თავდაპირველად თავად გამგებლობის კანდიდატი საკუთარ კანდიდატურას არ ხსნიდა.