ევროსაბჭოს ოფიციალური ვებგვერდი ვიდეოკადრებს ავრცელებს, სადაც ჩანს, როგორ მზადდება ასაკინძად ევროკავშირთან საქართველოს ასოცირების ხელშეკრულების დოკუმენტი. ევროკავშირთან ასოცირების ხელშეკრულების დოკუმენტი 1 135-გვერდიანია. საქართველოსა და ევროკავშირს შორის ასოცირების შეთანხმებას ხელი დღეს, თბილისის დროით 11:00 საათზე მოეწერება. დოკუმენტს ევროკავშირის 28-ვე წევრი ქვეყნის ხელმოწერა ექნება. ევროკავშირის შემადგენლობაში შემავალი სახელმწიფოების უმაღლესი პირები შეთანხმებაზე საკუთარ ხელმოწერას მას შემდეგ დააფიქსირებენ, რაც დოკუმენტს თავდაპირველად საქართველოს პრემიერ-მინისტრი ირაკლი ღარიბაშვილი და ევროკავშირის მხრიდან ევროკომისიის პრეზიდენტი ჟოზე მანუელ ბაროზუ და ევროკავშირის საბჭოს პრეზიდენტი ჰერმან ვან რომპეი გააფორმებენ.