საქართველოს პრეზიდენტმა მთავრობის ახალი შემადგენლობის შესახებ პრემიერ-მინისტრის მიმართვას ხელი მოაწერა. ამის შესახებ "ინტერპრესნიუსს" პრეზიდენტის ადმინისტრაციაში განუცხადეს. პრეზიდენტის პრესსამსახურის განმარტებით, ქვეყნის პირველი პირის მიერ ხელმოწერილი წარდგინება ნდობის გამოცხადების მიზნით პარლამენტს უკვე გადაეგზავნა. "პრეზიდენტის წარდგინება საკანონმდებლო ორგანოს ელექტრონული ფოსტით გადაეგზავნა", - განუცხადა "ინტერპრესნიუსს" პრეზიდენტის პრესსამსახურის უფროსმა თინათინ მჟავანაძემ. საქართველოს პრემიერ-მინისტრმა პრეზიდენტს მთავრობის ახალი შემადგენლობა გუშინ წარუდგინა. კონსტიტუციის მიხედვით, პარლამენტი ვალდებულია აღნიშნული საკითხი, 7 დღის ვადაში განიხილოს, თუმცა, უკვე ცნობილია, რომ პროცედურა დაჩქარდება და საკანონმდებლო ორგანო მთავრობის ახალი შემადგენლობისთვის ნდობის გამოცხადების საკითხს კენჭს 26 ივლისს უყრის.