ნიგერიაში, პანამის დროშის ქვეშ მცურავ გემზე დაკავებულ ქართველებთან დაკავშირებით საგარეო საქმეთა სამინისტროს სამი საელჩო ჰყავს ჩართული. როგორც საგარეო საქმეთა სამინისტროს საკონსულო დეპარტამენტის დირექტორმა, გიორგი ტაბატაძემ ჟურნალისტებს განუცხადა, ნიგერიაში დაკავებულ ქართველებთან დაკავშირებით მუშაობა მიმდინარეობს. "ამ კუთხით ჩვენ ჩართული გვყავს სამი საელჩო, კიევის საქართველოს საელჩო, სტამბულში საქართველოს გენერალური საკონსულო და ეთიოპიაში ჩვენი საელჩო, რათა მათ მოიძიონ ინფორმაცია, გაერკვნენ საქმის ვითარებაში და მოგვაწოდოს სრულყოფილი ინფორმაცია, რა მდგომარეობაში არიან ჩვენი მეძღვაურები ზოგადად, ასევე როგორ მიმდინარეობს ამ ფაქტის გამოძიება. აქედან გამომდინარე, ჩვენ გადავწყვეტთ რა შეიძლება გაკეთდეს იმისთვის, რომ მაქსიმალურად დავეხმაროთ ჩვენს მეზღვაურებს", - განაცხადა გიორგი ტაბატაძემ. პანამის დროშის ქვეშ მცურავ გემზე სამი ქართველი მეზღვაურია დაკავებული. აქედან ერთი კაპიტანია. გემის მფლობელია თურქული კომპანია. გემის ეკიპაჟს ბრალად ედება იარაღის კონტრაბანდა.