ღაზას სექტორში ძალაში შევიდა 72-საათიანი ზავი ისრაელსა და "ჰამასს" შორის. "ბიბისის" ინფორმაციით, თუ ცეცხლის შეწყვეტის შესახებ ზავი შენარჩუნდება, ისრაელი ეგვიპტეში დღეს დელეგაციას გააგზავნის კონფლიქტის გრძელვადიანი მოგვარების თაობაზე მოლაპარაკებებისთვის. ამასთან, სამდღიანი ცეცხლის შეწყვეტის შესახებ შეთანხმების დაწყებამდე, ბოევიკებმა ისრაელის მიმართულებით რამდენიმე რაკეტა გაუშვეს. არსებული ინფორმაციით, თავდასხმის შედეგად არავინ დაშავებულა. პალესტინური მედიის ცნობით, ღაზას სექტორში ცეცხლის შეწყვეტამდე ისრაელის თავდაცვის ძალების შეტევის შედეგად, ერთი ადამიანი დაიღუპა. გაერო-ს მონაცემებით, ღაზას სექტორში საომარი მოქმედებების დაწყებიდან სულ მცირე 2000 ადამიანი დაიღუპა, რომელთაგან 1900 პალესტინელია. ისრაელის მხარის განცხადებით, დაღუპულია 67 ადამიანი, მათ შორის სამი მშვიდობიანი მოსახლე.