ნიუ ჯერსის შტატში ავტოავარიის დროს დაღუპული ქართველი კურსანტების გადმოსვენების პროცედურები უკვე დაწყებულია. მათ, სავარაუდოდ, მომავალ კვირას ჩამოასვენებენ. გარდაცვლილთა ცხედრები ამ დროისთვის, დამატებითი ექსპერტიზის ჩატარების მიზნით, ნიუ ჯერსის პროზექტურაშია გადასვენებული. 

საქართველოს თავდაცვის სამინისტროს ინფორმაციით, რიგითი სოსო მაკარიძე ნიუ ჯერსიში ამერიკის საზღვაო თავდაცვის აკადემიის მე-4 დამამთავრებელი კურსის მსმენელი იყო. ის აკადემიაში 2011 წლიდან სწავლობდა. მეორე კურსის მსმენელი რიგითი ბესარიონ გორჯოლაძე კი საზღვაო თავდაცვის აკადემიაში 2013 წლიდან ირიცხებოდა.  ასევე, ორივე ახალგაზრდა დავით აღმაშენებლის სახელობის საქართველოს ეროვნული თავდაცვის აკადემიაში მსმენელად ირიცხებოდა.

ნიუ ჯერსიში ავარია გუშინ, გამთენიისას მოხდა. ერთი ქართველი კურსანტი ადგილზე გარდაიცვალა, მეორე კი ჰოსპიტალში მიყვანის შემდეგ.  ნიუ ჯერსიში, სადაც ინციდენტი მოხდა, გუშინვე ჩავიდნენ საქართველოს გენერალური საკონსულოს წარმომადგენლები. ისინი პირადად დაესწრენენ ცხდერების პროზექტურაში გადასვენებას. ამ დროისთვის მიმდინარეობს მოლაპარაკებები გადმოსვენების დეტალებთან დაკავშირებით. 

ავტომანქანას, რომელშიც ქართველი კურსანტები ისხდნენ, გავრცელებული ინფორმაციით, აშშ-ის მოქალაქე მართავდა. იგი ამჯამად ჰოსპიტალშია მოთავსებული.

ქართველი კურსანტების დაღუპვის გამო, ღრმა მწუხარება უკვე  გამოთქვეს საქართველოს თავდაცვის უწყებამ, ამერიკის საელჩომ, პრეზიდენტმა და პრემიერმა.