საერთაშორისო გამომძიებლების ჯგუფი ჰააგის სასამართლოს პროკურორის ფატუ ბენსუდას ხელმძღვანელობით დღეს თბილისში ჩამოდის. საქართველოში გამართული შეხვედრებისას სავარაუდოდ, განიხილება ის გეგმა, თუ როგორ წარიმართება საგამოძიებო მოქმედებები და როგორ აპირებენ საერთაშორისო გამომძიებლები ოკუპანტ ქვეყანასთან თანამშრომლობას. ფატუ ბენსუდა საქართველოს იუსტიციის სამინისტროსა და პროკურატურის წარმომადგენლებთან ერთად იმ დაზარალებულებსაც შეხვდება, რომლებიც რუსეთ-საქართველოს ომის დროს დევნილებად იქცნენ. დაგეგმილია ბრიფინგის გამართვაც. ჰააგის სისხლის სამართლის საერთაშორისო სასამართლოს პროკურორი მოსამართლეებს საქართველო-რუსეთის 2008 წლის ომის გამოძიების დაწყების ნებართვის მიცემასთან დაკავშირებით თხოვნით მიმართავს."სისხლის სამართლის საერთაშორისო სასამართლოს პროკურორმა, ფატუ ბენსუდამ თხოვნით მიმართა მოსამართლეებს, ნება დართონ პროკურორის ოფისს დაიწყოს გამოძიება 2008 წელს საქართველოში შეიარაღებული კონფლიქტის დროს ომის და ადამიანურობის წინააღმდეგ ჩადენილი დანაშაულების ფაქტებზე. ამ მიზნით პროკურორმა ითხოვა საქართველოში 2008 წლის 1ივლისიდან ამავე წლის 10 ოქტომბრამდე არსებული სიტუაციის გამოძიება.2008 წლის აგვისტოდან, მას შემდეგ რაც სამხრეთ ოსეთის სეპარატისტულ რეგიონსა და საქართველოს შორის შეიარაღებული შეტაკებები, რომელშიც ასევე რუსეთის ფედერაცია იყო ჩართული, გადაიზარდა შეიარაღებულ კონფლიქტში, პროკურორის ოფისი ჩაერთო საქართველოს საქმის წინასწარ შესწავლაში", - ნათქვამია ჰააგის სასამართლოს ვებ-გვერდზე გავრცელებულ ინფორმაციაში.