საქართველოს საგარეო საქმეთა სამინისტროს განცხადებით, ხურჩაში მომხდარ მკვლელობაზე საოკუპაციო რეჟიმის წარმომადგენლებს ღირებული ინფორმაცია არ გააჩნდათ. სამინისტროს პრესსამსახურის ცნობით, აღნიშნული საკითხი ჟენევის საერთაშორისო მოლაპარაკებების 36-ე რაუნდზე დადგა, რომელიც შვეიცარიაში 14-15 ივნისს გაიმართა.

"მონაწილეებმა საქართველოდან ორივე სამუშაო ჯგუფში მწვავედ დააყენეს 19 მაისს სოფელ ხურჩაში მომხდარი მკვლელობის საკითხი. ქართულმა მხარემ მონაწილეებს დამატებითი ინფორმაცია მიაწოდა მკვლელობის ფაქტზე და კატეგორიულად მოითხოვა დამნაშავის დაუყოვნებლივ დაკავება, რასაც მხარი დაუჭირეს თანათავმჯდომარეებმა და დანარჩენმა მონაწილეებმა. სამწუხაროდ, საოკუპაციო რეჟიმის წარმომადგენლებს არ გააჩნდათ ინფორმაცია აღნიშნულ საქმესთან დაკავშირებით. მონაწილეებმა იმედი გამოთქვეს, რომ 6 ივლისს გალში ინციდენტების პრევენციისა და მათზე რეაგირების მექანიზმის მორიგი შეხვედრა მეტ სიცხადეს შეიტანს ხურჩაში მომხდარი მკვლელობის საქმეში", -  აღნიშნულია გაცხადებაში.

მოლაპარაკებების მორიგი რაუნდი მიმდინარე წლის 4-5 ოქტომბერს გაიმართება.