2014-2016 წლებში აფხაზეთისა და სამხრეთ ოსეთის თვითაღიარებული რესპუბლიკები რუსეთისგან ყოველწლიურად 1 მილიარდ რუბლს (30 მილიონ დოლარს) მიიღებენ, - შესაბამის განკარგულებას რუსეთის პრემიერ-მინისტრმა, დიმიტრი მედვედევმა მოაწერა ხელი. თანხა რუსეთის ფედერაციის ბიუჯეტის, „საერთაშორისო ურთიერთობებისა და თანამშრომლობის“ მუხლშია განსაზღვრული. აღსანიშნავია, რომ აფხაზეთმა რუსეთისგან სოციალურ-ეკონომიკური განვითარების გეგმის ფარგლებში 2010-2012 წლებში 11 მილიარდი რუბლი (333 მილიონი დოლარი) მიიღო, ინვესტიციების ფარგლებში კი ფედერალური ბიუჯეტიდან - 6 მილიარდი რუბლი (182 მილიონი დოლარი). მხოლოდ 2013 წელს აფხაზეთისთვის გაწეულმა ფინანსურმა დახმარებამ 1,8 მილიარდი რუბლი (55 მილიონი დოლარი) შეადგინა. თუმცა, რუსეთი თანხების ხარჯვის მიზნობრიობით უკმაყოფილებას გამოთქვამს. რუსეთის ფედერაციის აუდიტის სამსახურის უფროსის, სერგეი რიაბუხინის განცხადებით, რკინიგზის, ჯანდაცვის, ტრანსპორტის სფეროში გარკვეული ღონისძიებები, რომელიც აღნიშნული თანხიდან ფინანსდებოდა, მხოლოდ 53%-ით შესრულდა. რაც შეეხება სამხრეთ ოსეთს, 2013 წელს რუსეთმა 2,7 მილიარდი რუბლი (82 მილიონი დოლარი) გადაურიცხა. 2012 წელს - 2,54 მილიარდი რუბლი (77 მილიონი დოლარი), 2011 წელს საინვესტიციო პროგრამების სახით გადაურიცხა 6,81 მილიარდი რუბლი (206 მილიონი დოლარი). ხოლო 2009 წელს 8,5 მილიარდი რუბლი (257 მილიონი დოლარი) აგვისტოს ომის შედეგების ლიკვიდაციისთვის, რომელიც თვითაღიარებული სამხრეთ ოსეთის პრეზიდენტის, ლეონიდ თიბილოვის განცხადებით, არაეფექტურად დაიხარჯა.