მოკლული ჟურნალისტის გიორგი სანაიას ოჯახი პროკურატურას პასუხობს. სანაიას ოჯახის თქმით, მათ მოთხოვნაზე ხელახალი გამოძიება დაწყებულიყო, პროკურატურამ არასაკმარისი პასუხი გასცა. აღნიშნული განცხადება გიორგი სანაიას ოჯახის წევრებმა დღეს საბურთალოს სასაფლაოზე გააკეთეს. "ჩვენ მიგვაჩნია, რომ ეს არის პოლიტიკური მკვლელობა. არსებობს ყველა საფუძველი იმისთვის, რომ დაიწყოს ამ საქმის ობიექტური გამოძიება. ასევე დაიწყოს გამოძიება, რომ ამ საქმეში ძალიან ბევრი ნივთმტკიცებულება ფალსიფიცირებული იყო. ის სასამართლო პროცესები სპექტაკლი იყო. ჩვენ ძალიან მკაფიოდ ვსვავთ შეკითხვას - აპირებს თუ არა მთავარი პროკურატურა გამოიძიოს გიორგი სანაიას პოლიტიკური მკვლელობა, რომელიც ბოლო წლების ერთ-ერთი ყველაზე გახმაურებული საქმეა", - განაცხადა ვახო სანაიამ. მისი თქმით, ოჯახი, მე-12 წელია ელოდება ამ საქმის გამოძიებას. ოჯახის განცხადებით, პროკურატურა ვალდებულია მოიძიოს ინფორმაცია და თავად დაადგინოს გარემოებები, მათი უფლებაა დაკითხონ ყოფილი მაღალჩინოსნები და ყოფილი ძალოვანი მინისტრები. როგორც "ინტერპრესნიუსთან" საუბარში ოჯახის წევრებმა განაცხადეს, არსებობს ყველანაირი საფუძველი იმისა, რომ გამოძიება დაიწყოს და საქმე ბოლომდე მივიდეს. პროკურატურიდან ოჯახისადმი გამოგზავნილ წერილში კი მითითებულია, რომ "განცხადებაში არ არის საქართველოს სისხლის სამართლის საპროცესო კოდექსის 310-ე მუხლით გათვალისწინებულ რაიმე ახლად გამოვლენილ გარემოებებზე მითითება. საქმემ გაიარა ყველა ინსტაციის სასამართლო კონტროლი. განაჩენი კანონიერ ძალაშია. ასეთ პირობებში პროკურატურა მოკლებულია განაჩენის გადასინჯვის პროცედურასთან დაკავშირებულ სამართლებრივ საფუძვლებს".