კულტურისა და ძეგლთა დაცვის მინისტრი გურამ ოდიშარია დადიანების სასახლის ეზოს ნაწილის გასხვისების საკითხის შესასწავლად ზუგდიდს დღეს, 21 ნოემბერს  ესტუმრა. მინისტრი ადგილობრივი გამგეობის წარმომადგენლებს და მუზეუმის დირექტორს ლილი ბერაიას ესაუბრა. ოდიშარიამ აღნიშნა, რომ ჯერ-ჯერობით სრულფასოვან დასკვნაზე ვერ ისაუბრებს.“მეც მეგონა ადრე, რომ აღნიშნული ტერიტორია მუზეუმის იყო, მაგრამ აღმოჩნადა, რომ ნაწილი მისი გასხვისებულია და გაფორმებულია კერძო პირზე, რაც გაუგონარი მოვლენაა“,-აღნი შნა მინისტრმა. მისივე განმარტებით, აღნიშნულ საკითხთან დაკავშირებით რამდენიმე კითხვისნიშანი არსებობს და საკითხს პირად კონტროლზე აიყვანს. მისივე თქმით, თბილისში დაბრუნებისთანავე შეიკრიბებიან სპეციალისტები და გააკეთებენ ყველაფერს, რომ ეს ტერიტორია, მუზეუმს და ქალაქს კანონის ფარგლებში დაუბრუნდეს. საჭიროების შემთვევაში კი ფაქტს შესაბამისი ორგანოები გამოიკვლევენ. ტერიტორიის მუზეუმის მფლობელობაში დაბრუნების შესახებ მინისტრმა აღნიშნა, რომ შეხვდება ეკონომიკის მინისტრს და დოკუმენტალურად გაეცნობა ყველაფერს, რის შემდეგაც შედგება სამკუთხედი კულტურის სამინისტროს, ეკონომიკის სამინისტროსა და მუზეუმის შემადგენლობით, რომლებიც აღნიშნულ საკითხს გადაწყეტენ. როგორც მუზეუმის დირექტორი ლილი ბერაია ამბობს, მან მინისტრს სასახლის მფლობელობაში ადრე არსებული ტერიტორიების ისევ მუზეუმისთვის დაბრუნება სთხოვა.