აივ ინფექციის ტესტირების ევროპულ კვირეულს ზუგდიდში ახალგაზრდა ფსიქოლოგთა ასოციაცია ქსენონი შეუერთდა. ევროპულ კვირეულში არა მარტო არასამთავრობო ორგანიზაციები, არამედ სახელმწიფო სტრუქტურები და სამედიცინო დაწესებულებებიც იღებენ მონაწილეობას. აღნიშნულთან დაკავშირებით ზუგდიდის მუნიციპალიტეტის გამგეობაში მრგვალი მაგიდა მოეწყო სახელწოდებით - "აივ შიდსი ფოკუსში დავიყვანოთ ნულამდე". რადიო "ათინათთან" საუბარში ასოციაცია ქსენონის ხელმძღვანელმა ნინო ჯანაშიამ აღნიშნა, რომ კვირეულის მიზანია საზოგადოების სტიმულირება იმისთვის, რომ ჩაიტარონ აივ შიდსზე გამოკვლევები. საზოგადოებრივი ჯანდაცვის დირექტორი ნანა ოდიშარია განმარტავს, რომ  სამეგრელოს რეგიონშიც ისევე, როგორც მთელ საქართველოში აივ შიდსით ინფიცირების სტაბილური მატებაა. ინფექციის გავრცელების კუთხითაც ჩვენი რეგიონი მეორე ადგილზეა. ნოემბრის მონაცემებით საქართელოში აივ ინფიცირების 4080 -მდე შემთხვევაა რეგისტრირებული აქედან 581 სამეგრელოს რეგიონში. ოდიშარია ასევე აღნიშნავს, რომ ზუგდიდის რაიონში 440 ინფიცირებული პაციენტია. ბოლო წლების მონაცემებით კი შიდსით ინფიცირებულთა უმეტეს ნაწილს 29-39 წლის ასაკის ადამიანები წარმოადგენენ. მკურნალობას საქართველოს მასშტაბით 41 ბავშვი გადის. სამეგრელოში კი მოზარდის ინფიცირების 8 შემთხვევაა რეგისტრირებული. ასოციაცია "ქსენონში" აივ შიდსზე ტესტირება 29 ნოემბრამდე ტარდება. ტესტირება  უფასოა და ანონიმურობა დაცულია.