11-შვილიანი ბეჭვაიების სოციალურად დაუცველ ოჯახს საცხოვრებელ სახლს შეუძენენ. როგორც ზუგდიდის მუნიციპალიტეტის გამგეობაში აცხადებენ, ბეჭვაიების საცხოვრებელი სახლის შესაძენად ფონდ "იავნანამ" 15 ათასი ამერიკული დოლარი გამოყო, ხოლო გამგეობამ 12 ათასი დოლარი. „ჯერ გადაწყვეტილი არ არის გამგებლის სარეზერვო ფონდიდან გამოიყოფა ეს თანხა სოციალურის დახმარებების მუხლიდან. რაც მთავარია, ბეჭვაიების მრავალშვილიან ოჯახს მალე საკუთარი საცხოვრებელი სახლი ექნება. ჩვენ ამ სახკითხზე საკრებულოს თავმჯდომარესაც ვესაუბრეთ და ის მხარს უჭერს ამ პროექტს“- უთხრა რადიო „ათინათს“ ზუგდიდის გამგებლის მოადგილის მოვალეობის შემსრულებელმა გიზო სართანიამ. 11 შვილის დედა, ნანა ბეჭვაიამ ამბობს, რომ ისინი ნაქირავებ ბინაში 2 წელია ცხოვრობენ, სადაც 200 ლარს იხდიან. მისივე თქმით, ქალაქში მათ უკვე შეარჩიეს სახლი, თუმცა საბოლოო გადაწყვეტილება ჯერ არ მიუღიათ. ნუგზარ ბეჭვაიას სოციალურად დაუცველი, 11 შვილიანი ოჯახის ერთადერთი შემოსავალი წყარო სოციალური დახმარებაა. ბეჭვაიების  უფროსი შვილი სტუდენტია, ხოლო ყველაზე უმცროსი 1 წლის.