"ჩვენ გვახსოვს 2008 წლის აგვისტო", – სტუდენტებმა და ადგილობრივებმა ეს წარწერა გორის ცენტრალურ მოედანზე სანთლებით გამოსახეს. რუსული აგრესიის დროს დაღუპული გმირები გორში კიდევ ერთხელ გაიხსენეს და მოედანზე 2000-მდე სანთელი აანთეს. რუსული აგრესიიდან 4 წლისთავზე გორის ცენტრალურ მოედანზე პირველი სანთელი დაღუპული ჯარისკაცის, გიორგი რომელაშვილის შვილმა დაანთო. ზუგდიდსა და სენაკში რუსეთის აგრესიის დროს დაღუპულთა ხსოვნისადმი მიძღვნილი აქციები ერთდროულად გაიმართა. აქცია სიმბოლურად 23:30 საათზე დაიწყო. სწორედ ამ დროს 2008 წლის 8 აგვისტოს სამეგრელოს ტერიტორია დაიბომბა. ზუგდიდში აქცია კინოთეატრ "ატრიუმის" წინ გაიმართა. აქციაზე ომის დროს ადგილობრივი ფოტოგრაფის მიერ გადაღებული ომის ამსახველი სურათები გამოიფინა. ასევე წარმოდგენილი იყო პანტომიმა ომის თემაზე. თბილისში, მშვიდობის ხიდიდან კი ათეულობით ანთებული სანთელი მტკვარში გაუშვეს. აქციის ფარგლებში, ორგანიზატორებთან ერთად ყველა მსურველს შეეძლო, წუთიერი დუმილით დაღუპულთა ხსოვნისადმი პატივი მიეგო. აქციის მიზანი საქართველოს თავისუფლებისათვის მებრძოლი ჯარისკაცების მიმართ მადლიერებისა და პატივისცემის გამოხატვა იყო.