ზუგდიდის მუნიციპალიტეტის  საკრებულოს „ნაციონალური მოძრაობის“ წევრისა და სასტუმრო „ოქროს საწმისის“ დირექტორის გიორგი წურწუმიას  დაკავების შესახებ საკრებულოში კომენტარს აკეთებენ. საკრებულოს აპარატის უფროსი თეიმურაზ ბასილაია ვარაუდობს, რომ  წურწუმიას დაკავება შესაძლებელია გარკვეული პროცედურული დარღვებით მოხდა. „ადგილობრივი თვითმმართველობის შესახებ საქართველოს ორგანული კანონის თანახმად, საკრებულოს წევრის დაკავების შესახებ უნდა ეცნობოს  საკრებულოს. ამასთან, უნდა იყოს შემოსული წერილობითი ცნობა, რომ ამ ადამიანზე არის აღძული სისხლის სამართლის საქმე და დაკავების შემთხვევაში საკრებულოს თავმჯდომარეს უნდა წარედგინოს შესაბამისი ორდერი. ამის შესახებ საკრებულოში არანაირი დოკუმენტი არ შემოსულა“, - განუცხადა რადიო „ათინათს“ თეიმურაზ ბასილაიამ. ამათან, თეიმურაზ ბასილაია აცხადებს, რომ იურისტებთან კონსულტაციის შემდეგ მიიღებენ გადაწყვეტილებას გააკეთებს თუ არა საკრებულოს ხელმძღვანელობა ოფიციაურ განცხადებას. შეგახსენებთ, რომ გუშინ ფინანსთა სამინისტროს საგამოძიებო დეპარტამენტის თანამშრომლებმა სასტუმროს “ოქროს საწმისის” დირექტორი გიორგი წურწუმია დააკავეს. მას გამოძიება, სავარაუდოდ, დოკუმენტების გაყალბებას ედავება. წურწუმიას ოჯახის წევრების თქმით, დაკავებულის შესახებ მათ რამდენიმე საათის დაგვაინებით აცნობეს. ისინი კომენტარს არ აკეთებენ. სასტუმრო “ოქროს საწმისის” დირექტორის გიორგი წურწუმია დაკავებისთანავე თბილისში, მოდულის შენობაში გადაიყვანეს.