"ახალი მემარჯვენეების" ლიდერი დავით გამყრელიძე დღეს ზუგდიდში დემოკრატიული ჩართულობის ცენტრში  ახალგაზრდებს შეხვდა და C  ჰეპატიტის პრევენციასა და მკურნალობასთან დაკავშირებით პარტიის პრიორიტეტები გააცნო. შეხვედრას ზუგდიდის მაჟორიტარი დეპუტატობის კანდიდატი მანანა ნაჭყებიაც დაესწრო. დავით გამყრელიძის თქმით C  ჰეპატიტის გავრცელების მასშტაბებმა ისეთი სახე მიიღო, რომ პარტიამ ამ პრობლემის მოგვარება საკუთარ პრიორიტეტად გამოაცხადა. "ჰეპატიტის გავრცელებით საქართველოს აღმოსავლეთ ევროპისა და ცენტრალური აზიის რეგიონში ყველაზე  მაღალი მაჩვენებელი აქვს. დაავადებულთა რაოდენობით საქართველო მსოფლიოში მესამე, ხოლო კავკასიაში პირველ ადგილზეა. ჩვენს ქვეყანაში C ჰეპატიტით დაავადებულთა რიცხვმა 200  000-ს გადააჭარბა, ამასთან ყოველწლიურად  დაავადების დაახლოებით 2000 ახალი შემთხვევა ვლინდება. განსაკუთრებით ეს დაავადება სწორედ ზუგდიდშია გავრცელებული" - განაცხადა დავით გაყრელიძემ. მემარჯვენეების ლიდერის თქმით C ჰეპატიტის მიმართ ეფექტური სახელმწიფო პოლიტიკის არარსებობა ხელს უწყობს ამ დაავადების სახიფათო მასშტაბით  გავრცელებას. "ქვეყანაში არ არსებობს დაავადების მკურნალობის სახელმწიფო პროგრამა.  სადაზღვევო მომსახურების არც ერთ პაკეტში არ შედის არა მარტო ჰეპატიტების დიაგნოსტიკა და ანტივირუსული მკურნალობის ანაზღაურება, არამედ სხვა ჰეპატოტროპული მედიკამენტების დაფინანსებაც კი. დიაგნოსტირება და  მკურნალობა ისეთი ძვირია, რომ  დაავადებულთა ოჯახებს მისი გადახდა პრაქტიკულად არ შეუძლიათ, რის გამოც უამრავი ადამიანი სიკვდილისთვის არის განწირული" - განაცხადა დავით გამყრელიძემ. "ბიუჯეტიდან ყოველწლიურად უნდა დაფინანსდეს C ჰეპატიტით დაავადებული მინიმუმ 2000 პაციენტის მკურნალობის ხარჯი ავადმყოფთა შერჩევის კრიტერიუმები სპეციალისტებმა უნდა დაადგინონ). უნდა დაწესდეს მკაცრი კონტროლი სტერილიზაციის წესების დაცვაზე კლინიკებსა და ყველა იმ დაწესებულებაში, სადაც C ჰეპატიტით დაინფიცირების მაღალი რისკია. ამის გარდა უნდა დაიწყოს ინტერფერონის  წარმოება საქართველოში. აქ სახელმწიფომ  ეწ. დოჰა-ს  დეკლარაცია უნდა გამოიყენოს, რომელიც ჩვენისთანა ქვეყნებს ამის უფლებას აძლევს" - განაცხდა დავით გამყრელიძემ. "ახალი მემარჯვენეები" ქვეყანაში ღვიძლის გადანერგვის სახელმწიფო პროგრამის განხორციელებასაც ითხოვენ, რაც  საწყის ეტაპზე მოწვეული სპეციალისტების ხარჯზე უნდა მოხდეს.