"ახალი მემარჯვენეების" თავმჯდომარემ დავით გამყრელიძემ და ქობულეთის მაჟორიტარი დეპუტატობის კანდიდატმა ხათუნა კახაძემ დაბა ჩაქვში მოსახლეობას პარტიის საარჩევნო პროგრამა "შეძლებული ოჯახი სოფლად და ქალაქად"  გააცნეს. შეხვედრას პარტიის ლიდერები  ზუგდიდის მაჟორიტარი დეპუტატობის კანდიდატი მანანა ნაჭყებია და ლევან კალანდაძეც ესწრებოდნენ. პარტიის ლიდერებმა მოსახლეობას პარტიის პროგრამის  ის მიმართულებები  გააცნეს, რომელთა განხორციელების შემთხვევაში საქართველოში ყველა ოჯახს -სოფლადაც და ქალაქადაც შემოსავლის სტაბილური წყარო და ცხოვრების ღირსეული პირობები ექნება. "ქობულეთის რაიონს უზარმაზარი პოტენციალი აქვს აქ მცხოვრები ყველა ოჯახი მართლაც შეძლებულად ცხოვრობდეს. მარტო ტურიზმი და ზღვის ორთვიანი სეზონი ამის გარანტიას ვერ შექმნის. საჭიროა რაიონის თითო სოფელში თითო საწარმო მაინც იყოს და სწორედ ამ მიმართულებით ინვესტიციის ჩადებისთვის ბიზნესის წახალისებას, მცირე ბიზნესის განვითარების სპეციალური ფონდის, სასოფლო ბანკის შექმნას ითვალისწინებს "ახალი მემარჯვენეების" პროგრამა", - განაცხადა დავით გამყრელიძემ. "ახალი მემარჯვენეების" ქობულეთის მაჟორიტარი დეპუტატობის კანდიდატმა ამომრჩეველს აქტიურობისკენ და "ახალი მემარჯვენეების" მხარდაჭერისკენ მოუწოდა. "ქობულეთელებმა იციან რას ნიშნავს შეძლებული ოჯახი და ისიც იციან, რომ "ახალ მემარჯვენეებს" ამ პროგრამის განხორციელების უნარი და ცოდნა გვაქვს. ჩვენ გვჭირდება თქვენი მხარდაჭერა, რომ პარლამენტში მომავალი 4 წლის განმავლობაში ეს პრიორიტეტები რელურად გავატაროთ ცხოვრებაში", - განაცხადა ხათუნა კახაძემ.