„ჩემს საქმეზე სასამართლო პროცესის გაჭიანურება ცალსახად პოლიტიკური დევნაა.“- განაცხადა დღეს, 24 მარტს გამართული სასამართლო პროცესის დასრულების შემდეგ“ სამეგრელოს ხმის „ლიდერმა თენგიზ ჟგუშიამ. ჯგუშიას თქმით, ბრალდების მხარის მიერ სასამართლო პროცესის განგებ გაჭიანურების საფუძველი მისი პოლიტიკური აქტიურობაა, იგი ასევე არ გამორიცხავს , რომ ამ გზით სურთ მისი დაშინება გახმაურებულ წყლის მილების ამოღების საქმეზე გამოძიებაში ჩართულობის გამო. მისი ბრალდების საქმეზე კი ჯგუშია აცხადებს, რომ ზუგდიდის მუნიციპალიტეტის გამგებლის მოადგილის მოვალეობის შემსრულებელ მერაბ ქვარაიას ცეცხლსასროლი იარაღი აუცილებელი მოგერიების მიზნით ესროლა. პროცესის გაგრძელების პოლიტიკურ სარჩულზე საუბრობს ბრალდებულის ადვოკატი ჯიტა გულუაც, იგი მიიჩნევს, რომ პროკურატურა განგებ აჭიანურებს მოწმეების დაბარებას და დაკითხვას, მისი თქმით ბრალდების მხარეს კიდევ 13 მოწმე ჰყავს დასაკითხი. დღეს გამართულ სხდომაზე ბრალდების მხარის 3 მოწმე დაიკითხა, მათგან ორი ჯგუშისა და ქვარაიას შელაპარაკების მომსწრე რიყის მაცხოვრებელი იყო, ხოლო მესამე მოწმეს გამგებლის მოადგილის მოვალეობის შემსრულებელი გიორგი თოდუა წარმოადგენდა. როგორც ბრალდებულის ადვოკატი აცხადებს მოწმეებმა პროცესზე დადასტურეს, რომ შელაპარაკება უშუალოდ ჯგუშიასა და ქვარაიას შორის მოხდა და ჯგუშიას სუფრის სხვა წევრებთან კონფლიქტი არ მოსვლია. შეგახსენებთ, რომ ინციდენტი 2013 წლის 8 აგვისტოს მოხდა. ყოფილმა პარლამენტარმა, ორგანიზაცია “სამეგრელოს ხმის” დამფუძნებელმა, თენგიზ ჯგუშიამ ზუგდიდის მუნიციპალიტეტის გამგებლის მოადგილის მოვალეობის შემსრულებელს, მერაბ ქვარაიას ცეცხლსასროლი იარაღიდან ესროლა. რასაც წინ უძღოდა მათ შორის სუფრაზე მომხდარი შელაპარაკება რა დროსაც ჯგუშიამ ქვარაიას სილა გააწნა.