„ერთიანი ნაციონალური მოძრაობა“ დღეს ზუგდიდში ხალხმრავალ შეკრებას გეგმავს, თუმცა ,მანამდე საარჩევნო შტაბის ხელმძღვანელი ლაშა დამენია ხელისუფლების წარმომადგენელების მხრიდან ხელისშემშლელ ფაქტორებზე საუბრობს. მისი ცნობით, ხობსა და სენაკში „ნაციონალური მოძრაობის“ მხარდამჭერებს მიკროავტობუსის მძღოლებმა, ზუგდიდში გადაყვანაზე მოულოდნელად უთხრეს უარი. ამასთან, ლაშა დამენია ზუგდიდის გამგეობის წარმომადგენლებს, მოსახლეობის დაშინებაში ადანაშაულებს. „ზუგდიდის გამგეობის წარმომადგენლები მიდიან მოსახლეობასთან, ზოგს სთხოვენ, ზოგს აშინებენ, რომ არ მოვიდნენ ჩვენს შეკრებაზე. „ჰაკიმ-ფაშა“ ერთი ხელით პოლიციელების კორდონს გვიკეთებს და ვითომ გვიცავს, მეორე ხელით კი ოცნების წარმომადგენლებს მოგვისევს ხოლმე“, - განუცხადა რადიო „ათინათს“ ლაშა დამენიამ. ლაშა დამენიას ბრალდებებს ზუგდიდის მუნიციპალიტეტის გამგეობაში აბსურდულს უწოდებენ და ხალხის დაშინებას „ნაციონალების“ სტილს უწოდებენ. „ნაციონალური მოძრაობა წლების განმავლობაში მიჩვეული იყო ამგვარი ხერხების გამოყენებას და ჰგონიათ, რომ დღევანდელი ხელისუფლებაც იგივეს აკეთებს. ამით, ისინი ცდილობენ დაამტკიცონ, რომ პოლიტიკურად ჯერ კიდევ ცოცხლები არიან“, - აცხადებს ზუგდიდის გამგებლის მოადგილის მოვალების შემსრულებელი გიორგი თოდუა. ცნობისთვის, „ნაციონალური მოძრაობა“ წინასაარჩევნო კამპანიას დღეს ზუგდიდიდან იწყებს. აღნიშნულთან დაკავშირებით, დღის ბოლომდე ცენტრალური ხეივნის მიმდებარე ტერიტორია გადაკეტილი იქნება. მძღოლებს გადაადგილება კოსტავას ქუჩით შეეძლებათ.