საქართველოს მთავრობა პროექტ "ჯვარი-ხორგას" განხორციელებას იწყებს. ხელშეკრულებას, რომლის მიხედვითაც "საქართველოს სახელმწიფო ელექტროსისტემა" და მისი შვილობილი კომპანია "ენერგოტრანსი", 500-220 კილოვოლტიან მაღალი ძაბვის ქვესადგურისა და 220 და 500 კილოვოლტიანი ორჯაჭვა ხაზების მშენებლობას განახორციელებენ, ხელი დღეს ვიცე-პრემიერმა, ენერგეტიკის მინისტრმა კახა კალაძემ, ფინანასთა მინისტრმა ნოდარ ხადურმა და "საქართველოს სახელმწიფო ელექტროსისტემის" რეაბილიტაციის მმართველმა სულხან ზუმბურიძემ მოაწერეს. "ჩვენთვის ამ პროექტის განხორციელება ძალიან მნიშვნელოვანია, რადგან უფრო მეტი საშუალება გვექნება, რომ დაცულები ვიყოთ – თუკი დასავლეთ საქართველოში გამოირთვება ერთი ხაზი, გვექნება ალტერნატიული საშუალება, რომ ახალი ქვესადგურისა და ელექტროგადამცემი ხაზის საშუალებით უპრობლემოდ მივაწოდოთ ელექტროენერგია მოსახლეობას. ასევე ეს ზრდის საშუალებას დასავლეთ საქართველოში წარმოებული ელექტროენერგია თავისუფლად გავიტანოთ ექსპორტზე. ასევე ხელს შევუწყობთ თავისუფალი ზონის განვითარებას. დღეისთვის შეუძლებელია, მაგალითად, ფოთში ფუნქციონირებდეს გადამამუშავებელი ქარხნები, რადგან არ გვაქვს შესაბამისი ელექტროენერგია, რომ მათ მივაწოდოთ. აღნიშნული პროექტის განხორციელების შემდეგ, ეს შესაძლებელი იქნება", - განუცხადა კახა კალაძემ ჟურნალისტებს. პროექტს "მნიშვნელოვანს" უწოდებს ნოდარ ხადურიც. ფინანსთა მინისტრის განცხადებით, მისი განხორციელება, ერთი მხრივ, ხელს შეუწყობს ადგილობრივი ელექტრომომარაგების სტაბილურობის უზრუნველყოფას, მეორე მხრივ კი, მოგვცემს შესაძლებლობას დამატებითი ელექტროენერგიის ექსპორტი მოვახდინოთ ევროკავშირის ქვეყნებსა და თურქეთში.ჯვარის 500-220 კვ ქვესადგურის მშენებლობის კონტრაქტორია ტენდერში გამარჯვებული პორტუგალიური კომპანია EFACEC, ხოლო გამდამცემი ხაზის მშენებლობას განახორციელებს - ინდური ფირმა "ჟყოტი ცონსტრუცტიონი". პროექტის მიზანია 220 კილოვოლტიანი ქსელის იმედიანობის გაზრდა და დასავლეთ საქართველოს ელექტრომომარაგების წყაროების დივერსიფიკაცია; ფოთის თავისუფალი ინდუსტრიული ზონის ელექტრომომარაგების საიმედოობის ამაღლება და გაზაფხულის წყალმეტობის პერიოდში საექსპორტო ელექტროენერგიის სიმძლავრეების უზრუნველყოფა; ელექტროგადამცემი ხაზით "კავკასიონი" გადასაცემ და მისაღებ სიმძლავრეებზე სრული კონტროლის უზრუნველყოფა და მაღალი ძაბვის ქსელის საიმედოობის და სტაბილურობის გაზრდა. პროექტის განხორციელებით შეიქმნება მოქნილი და მომგებიანი ენერგოგაცვლის ქსელი დასავლეთ საქართველოში, საგრძნობლად გაუმჯობესდება საერთაშორისო და ადგილობრივი მომსახურების ხარისხი და საიმედობა. და, რაც მთავარია, ინვესტორებისთვის მომხიბვლელი გახდება ენგურის ხეობაში ასაშენებელი ჰიდროელექტროსადგურების ინვესტირების საკითხი. პროქტის საერთო ღირებულება დაახლოებით 50 მლნ. ევროს შეადგენს. პროექტის დააფინანსებენ გერმანიის განვითარებისა და რეკონსტრუქციის ბანკი (KFW); ევროპის განვითარებისა და რეკონსტრუქციის ბანკი (EBRD) და ევროკავშირის სამეზობლო საინვესტიციო მექანიზმი (NIF). პროექტის განხორციელება მიმდინარე წელს დაიწყება და 2016 წელს დასრულდება.