„გომორძგუა სამარგალო, გომორძგუა ზუგდიდი, სამარგალოქ წოხოლე ოკო ეწაუნას საქორთუოს", - ამ სიტყვებით მიესალმა პრემიერ-მინისტრი ირაკლი ღარიბაშვილი ქალაქის ცენტრალურ მოედანზე შეკრებილ მოსახლეობას. პრემიერის თქმით, სამეგრელო სწორედ ის რეგიონია, რომელმაც ყველა უსამართლობა და ძალადობა იწვნია, განსაკუთრებით 90-იან წლებში. "თქვენ, მეგრელებმა იცით სამშობლოს ფასი, იცით ერთიანი საქართველოს ფასი, დამოუკიდებლობის ფასი და ამას ყოველ დროში ადასტურებდით. სამეგრელო ყოველთვის ამბობდა თავის სიტყვას და განსაკუთრებულ როლს ასრულებდა საქართველოს ისტორიაში. საქართველოს დამოუკიდებლობას და თავისუფლებას შესწირა სიცოცხლე მერაბ კოსტავამ. სამშობლოზე ფიქრსა და ზრუნვაში იცხოვრა და ტრაგიკულად აღესრულა საქართველოს პირველი პრეზიდენტი. სწორედ ზვიად გამსახურდიასა და მერაბ კოსტავას დამსახურებაა, რომ დღეს ჩვენი სამშობლო არის დამოუკიდებელი ქვეყანა", - განაცხადა პრემიერ-მინისტრმა. ირაკლი ღარიბაშვილმა აღნიშნა,რომ  მერაბ კოსტავას და ზვიად გამსახურდიას წვლილი ქვეყნის დამოუკიდებლობის საქმეში უდიდესია. შეკრებილებმა წუთიერი დუმლით მათ ხსოვნას  პატივი მიაგეს.