ზუგდიდის მუნიციპალიტეტის საკრებულოს წარმომადგენლებმა, „ნაციონალური მოძრაობის“ მერობისა და მაჟორიტარი დეპუტატობის კანდიდატებმა, საქართველოს დამოუკიდებლობის დღესთან დაკავშირებით, ზვიად გამსახურდიას და მერაბ კოსტავას ძეგლები თაიგულით შეამკეს. „ყველას ვულოცავ საქართველოს დამოუკიდებლობის დღეს. ეს დღე არის ქართველი ერის გამოღვიძებისა და გამარჯვების დღე. მინდა მოვიგონო ყველა ის ადამიანი, რომლებმაც საქართველოს თავისუფლებისთვის თავი გასწირეს“, ამბობს „ნაციონალური მოძრაობის“ ზუგდიდის მერობის კანდიდატი თეიმურაზ ბასილაია. ცნობისთვის, საქართველოს დამოუკიდებლობის დღე 1918 წლიდან იღებს სათავეს. 1917 წლის რუსეთში მომხდარ ბურჟუაზიულ რევოლუციას მონარქიის დამხობა და იმპერიის დაშლა მოჰყვა. საქართველოში ამავე პერიოდში შეიქმნა ეროვნული საბჭო, რომელიც, ფაქტობრივად, ქვეყანას მართავდა. ეროვნული საბჭოს დადგენილებით, 1918 წლის 26 მაისს საქართველო დამოუკიდებელ რესპუბლიკად გამოცხადდა.