"ნაციონალური მოძრაობის“ ზუგდიდის მერობის კანდიდატი თეიმურაზ ბასილაია სახელისუფლო პარტიის მხარდამჭერების მხრიდან ზეწოლის ფაქტებზე საუბრობს. ბასილაიას განცხადებით, „ქართული ოცნების“ აქტივისტები ღამის საათებში გადაადგილდებიან ავტომანქანებით და ანადგურებენ მათ საარჩვევნო პლაკატებს. „გრძელდება ტოტალური ზეწოლა საარჩევნო პროცესებზე. ჩვენ შევძელით დაგვეფიქსირებინა ის მანქანები და პიროვნებები, რომლებიც დადიან ავტომანქანებით და აშინებენ ჩვენს მხარდამჭერებს. ესენია: AUDI A4-ს მარკის ავტომანქანა სახელმწიფო ნომრით - KES 10*, ISUZUS-ტიპის ავტომანქანა ნომრით - SST 94* და ა.შ. ამ ავტომანქანებით მოძრაობენ საშა მოლაშხია, თენგიზ აბულაძე და ზაზა კვარაცხელია და სხვები“, - აცხადებს თეიმურაზ ბასილაია. ამასთან, ბასილაია აცხადებს, რომ ზუგდიდის თითქმის ყველა საარჩევნო უბანზე „ნაციონალური მოძრაობის“ კომისიის წევრებზე და თავმჯდომარეებზე ზეწოლა ხორციელდება. „ერთიანი ნაციონალური მოძრაობის“ საარჩევნო შტაბი სამართალდამცავებს ზემოაღნიშნული ფაქტების გამოძიებისკენ მოუწოდებს. „ნაციონალური მოძრაობის“ ბრალდებებს „ქართული ოცნების საარჩევნო შტაბში არ უპასუხეს. ისინი კომენტარს არ აკეთებენ.