დღეს, „ერთიანი ნაციონალური მოძრაობის“ ზუგდიდის გამგებლობის კანდიდატი თენგიზ გუნავა და პარტიის სხვა წარმომადგენლები, სოფელ ჯიხაშკარში, პოლიციიდან გათავისუფლებულ ბექა ჩარგაზიას, მისი ოჯახის წევრებსა და სოფლის ცენტრში შეკრებილ მოსახლეობას შეხვდნენ. ყოფილი პოლიციელი ბექა ჩარგაზია ამბობს, რომ სამსახურიდან მისი გათავისუფლება პოლიტიკური ნიშნით მოხდა. „რამდენიმე დღის წინ „ქართული ოცნების“ შეკრება იყო ჩვენთან. ხალხმა შეკრება რომ დაიწყო, მანქანიდან „ქართული ოცნების“ საარჩევნო შტაბის ხელმძღვანელი ლაშა გვასალია გადმობრძანდა და მათ უთხრა: „თურმე თქვენი თანასოფლელი, პოლიციის მოქმედი თანამშრომელი,  „ნაციონალური მოძრაობის“ სასარგებლოდ ატარებს აგიტაციასო. ხალხის კითხვაზე, თუ ვინ იყო ის, გვასალიამ უპასუხა: ამას ხვალ გაიგებთო!“, - ამბობს ბექა ჩარგაზია. ბექა ჩარგაზიას თქმით, ამის შემდეგ, ის სამსახურიდან მეორე დღესვე გაათავისუფლეს. გარდა ამისა, ჩარგაზიას ოჯახის წევრები აცხადებენ, რომ ბოლო რამდენიმე თვეა , მათ ოჯახზე პოლიტიკური ზეწოლა სისტემატიურად ხორციელდება. „ნაციონალური მოძრაობის“ წარმომადგენლები ჩარგაზიების ოჯახს დახმარებას დაჰპირდნენ. „ჩვენ ამ საკითხს ყველა არასამთავრობო ორგანიზაციას გავაცნობთ. ეს არის პოლიტიკური დაკვეთა. მინდა აღვნიშნო, რომ „ნაციონალური მოძრაობის" გამარჯვების შემთხვევაში, ჩვენ ბექა ჩარგაზიას სოფლის გამგებლად წარვადგენთ“, - თქვა თენგიზ გუნავამ. „ქართული ოცნების“ საარჩევნო შტაბის ხელმძრვანელი ლაშა გვასალიამ რადიო „ათინათან“ საუბარში განაცხადა, რომ მას ბექა ჩარგაზიას გათავისუფლებაში წვლილი არ მიუძღვის, თუმცა ამბობს, რომ „ბექა ჩარგაზია არამარტო  „ნაციონალური მოძრაობის“ საარგებლოდ ატარებდა აგიტაციას, არამედ ხევდა „ქართული ოცნების“ პლაკატებს“. „მე ვთქვი, რომ ეს იყო არასწორი და ამას უცილობლად გაეცმოდა პასუხი შესაბამისმა სამსახურებიდან. მას ჰქონია გაფრთხილება სამსაურში და ალბათ ესეც გაიგეს და მიიღეს გადაწყვეტილება. მერე ეს ბიჭი მოვიდა ჩემთან და მითხრა ასეთი რაღაც მოხდაო...მე ვუთხარი: არ უნდა გაგეკეთებინა ძმაო ეს. შენ ხელისუფლების, ძალოვანი სტრუქტურის წარმომადგენელი ხარ და ხევ პლაკატებს, ეს მიუღებელია და ეტყობა შესაბამისი პასუხი მიიღე- მეთქი“, - ამბობს ლაშა გვასალია.