დღეს, ზუგდიდში , დემოკრატიული ჩართულობის ოფისში, „ნაციონალური მოძრაობის“ ხობის გამგებლობის კანდიდატმა მამუკა ჭოხონელიძემ პრესკონფერენცია გამართა. მისი განმარტებით, მმართველი პარტიის წარმომადგენლების მხრიდან „ნაციონალური მოძრაობის“ კანდიდატებზე  ზეწოლა და დაშინება ხორციელდება. ამასთან, ჭოხონელიძე ამბობს, რომ ხობის გამგეობის სამსახურები საარჩევნო აგიტაციებისთვის ადმინისტრაციულ რესურსს იყენებენ. „წარმოუდგენლად დაიძაბა წინასაარჩევნო ვითარება ხობში. ხელისუფლების მხრიდან ადგილი აქვს ზეწოლის ფაქტებს, როგორც დეპუტატობის კანდიდატებზე ასევე, ჩვენს მხარდამჭერებზე. აქვს ადგილი, სახელმწიფო რესურსების გამოყენებას. მაინცდამაინც ეხლა მოუნდათ დაარიგონ აგრობარათები, აცრები გაუკეთონ მსხვილფეხა პირუტყვს. ასევე, მოსახლეობას ეუბნებიან,რომ  თუ "ნაციონალურ მოძრაობას" მისცემენ ხმას, სოციალურ დახმარებას მოუხსნიან“, - აცხადებს მამუკა ჭოხონელიძე. აგრეთვე, მამუკა ჭოხონელიძე მმართველი პარტიის წარმომადგენლის, სოფელ პატარა ფოთის საჯარო სკოლის დირექტორის, ლეონიდე ლოლუას მხრიდან ზეწოლის ფაქტსაც იხსენებს და ამბობს, რომ მათ დირექტორი სოფელში აგიტაციასა და საარჩევნო პლაკატების გაკვრას უკრძალავდა. „ლოლუა მოვიდა და ფეოდალივით გამოგვიცხადა: ეს სოფელი ჩემია და თქვენ უფლება არ გაქვთ შემოდიოდეთ აქ და აკრავდეთ პლაკატებსო. თქვენ წარმოიდგინეთ, ჩვენს ერთ-ერთ კანდიდატს ლამის მანქანით გადაუარა“,-ამბობს ჭოხონელიძე. ლეონიდე ლოლუა ხობის გამგებლობის კანდიდატის ბრალდებებს უარყოფს და აცხადებს, რომ სოფელში „ნაციონალურ მოძრაობას“ "უარყოფითად ხალხი დახვდა". „არა, არ ყოფილა ასეთი ფაქტი. მათ ხალხი დახვდა უარყოფითად და თუ ის ხალხზე იძახის მეც ხალხი ვარ. მოვიდეს ბატონო ვინ უშლის“,- უთხრა რადიო „ათინათს“ ლეონიდე ლოლუამ.