დღეს, „სახალხო პარტიის” ზუგდიდის გამგებლობის კანდიდატმა  ვახუშტი ფარცვანიამ ზუგდიდის ელიტის  ნაწილი მმართველი პარტიის მხარდაჭერაში დაადანაშაულა და ქალაქის მოღალატეებად გამოაცხადა. „საზოგადოების დიდმა ნაწილმა, პედაგოგებმა და საზოგადოება „ზუგდიდელის“ ხელმძღვანელობამ, მიუხედავად არაერთი გაფრთხილებისა, მათ ხელი არ აიღეს ჩვენი რეგიონის წინააღმდეგ მიმართულ დანაშაულებრივ  ქმედებებში მონაწილეობისგან. ისინი აქტიურად მფარველობენ ბნელ ძალებს და მონაწილეობას იღებენ ხვალინდელი დღის დასამარებაში. ამიტომ, დღეიდან მათ მტრებად და მოღალატეებად ვაცხადებ“, - თქვა ვახუშტი ფარცვანიამ დემოკრატიული ჩართულობის ცენტრში გამართულ ბრიფინგზე. მისივე თქმით, თვითმმართველობის არჩევნების დასრულების შემდეგ,  „მოღალატეების“ პერსონალურ სიას გამოაქვეყნებს და მათ წინააღმდეგ სამოქალაქო ფრონტს დაიწყებს. საზოგადოება „ზუგდიდელის“ თავმჯდომარის მოადგილე მურმან ნაჭყებია, ზუგდიდის გამგებლობის კანდიდატს, ვახუშტი ფარცვანიას შეურაცხმყოფელი განცხადებების გაკეთებისგან თავშეკავებას ურჩევს. „ვახუშტი ფარცვანიას თუ რამე უნდა, „ზუგდიდელის“ კარი ყველასთვის ღიაა. დავჯდეთ ვისუბროთ, ვიკამათოთ ცივილიზებული ფორმით და არა უნდა ვესაუბროთ ერთმანეთს ასეთი განცხადებებით. მინდა ასევე ავღნიშნო, რომ არავის საქმე არ არის, მე ვის დავუჭერ მხარს. მე მხარს ვუჭერ სამართლიანობას, რადგან ერთხელ და სამუდამოდ საქართველოში სამართლიანობა დამკვიდრდეს“, - თქვა რადიო „ათინათთან" საუბარში მურმან ნაჭყებიამ. „სახალხო პარტიის” ზუგდიდის გამგებლობის კანდიდატმა  ვახუშტი ფარცვანიამ ზუგდიდის ინტელიგენციის ნაწილს რამდენჯერმე მოუწოდა თავი შეეკავებინათ სახელისუფლო პარტიის მხარდაჭერისგან. მან აღნიშნული მოთხოვნით, ზუგდიდის დემოკრატიული ჩართულობის ოფისში, ბრიფინგი 3-ჯერ გამართა.