მოძრაობა „სამეგრელოს ხმის“ ლიდერმა თენგიზ ჯგუშიამ თანამოაზრეებთან და მხარდამჭერებთან ერთად ზუგდიდის მუნიციპალიტეტის გამგეობის შენობასთან აქცია გამართა. აქციის მონაწილეებმა თენგიზ ჯგუშიასა და მერაბ ქვარაიას შორის არსებული სასამართლო დავის გაჭიანურება გააპროტესტეს. მათი თქმით, ერთი წლის განმავლობაში მერაბ ქვარაია შეგნებულად არ გამოცხადდა სასამართლო პროცესზე. „როგორ შეიძლება კაცებმა ზუგდიდში მეგობრულად და ძმურად ვერ გავარჩიოთ საქმე, იმის გამო, რომ ორი სიტყვით ერთმანეთს ვერ გავუგოთ, პროკურატურაში უნდა ვირბინოთ?“-აცხადებს ჯგუშია.„სირცხვილია, როცა ადამიანი, რომელსაც მაღალ თანამდებობებზე აქვს პრეტენზია თანამოქალაქეს ციხისთვის იმეტებს.“-აღნიშნა „არასაპარლამენტო ოპოზიციის“ გამგებლობის კანდიდატმა ციცინო შენგელიამ. შეგახსენებთ, რომ ინციდენტი „სამეგრელოს ხმის“ ლიდერ თენგიზ ჯგუშიასა და კოალიცია "ქართული ოცნების" პოლიტ. საბჭოს წევრს მერაბ ქვარაიას შორის 2013 წლის 8 აგვისტოს მოხდა. ჯგუშიამ ქვარაიას ცეცხლსასროლი იარაღიდან ესროლა. რასაც წინ უძღოდა მათ შორის სუფრაზე მომხდარი შელაპარაკება, რა დროსაც ჯგუშიამ ქვარაიას სილა გააწნა. სასამართლო განხილვა აღნიშნულ საქმეზე დეკემბრის თვიდან მიმდინარეობს.