რიგის ქუჩაზე გაყვანილი მილი თეთრი გიორგის ქუჩაზე არსებულ ძველ საკანალიზაციო მილს უნდა შეუერთდეს,რომელიც პრობლემურია და წვიმის დროს მისგან გადმოსული წყალი სახლებში შედის. თეთრი გიორგის ქუჩის მაცხოვრებლები მოითხოვენ, რომ ჯერ მათ ქუჩაზე მოხდეს ძველი მილის გაწმენდა და წყლის საწრეტი მილის ხელახლა დამონტაჟება, წინააღმდეგ შემთხვევაში რიგის ქუჩის მილის შეერთება მათ ქუჩაზე მილის გახეთქვას გამოიწვევს. „ერთს აკეთებენ და მეორეს აფუჭებენ, თვითონ არ იციან რომ შეიძლება ეს მილი გასკდეს და უარესად დაიტბოროს ყველაფერი?!.“-აცხადებს თეთრი გიორგი ქუჩის მაცხოვრებელი ნუნუ სალაყაია. "სახლში ფეკალური მასები შემოგვდის, რაც ხეხილი და ბოსტანი გვქონდა გაგვინადგურა,ამიტომ იძულებულები ვართ არ შევაერთებინოთ ეს მილები,აუცილებელია ჩვენს ქუჩაზე არსებული მილი დიდი მოცულობის მილით შეიცვალოს, მერე შევაერთებთ“-ამბობს ამავე ქუჩის მაცხოვრებლი რუსუდან გვაჯაია. თეთრი გიორგის ქუჩის მაცხოვრებლებთან სასაუბროდ მათ მიერ არჩეული მაჟორიტარი დეპუტატი გიორგი თოდუა მივიდა, მან შეკრებილებს უთხრა, რომ რიგის ქუჩაზე მილის გაყვანა დასრულდება,თუმცა, მისი შეერთება და ამუშავება არ მოხდება,სანამ თეთრი გიორგის ქუჩაზე არსებული პრობლემა არ მოგვარდება. იგი მაცხოვრებლებს სანიაღვრე და საკანალიზაციო მილების გაწმენდასთან ერთად, გზის რეაბილიტაციას და გარე განათების დამონტაჟებასაც დაპირდა. „ამ პრობლემაზე ექსპერტები იმუშავებენ და ისე არ მოხდება, რომ მოსახლეობის ერთ ნაწილს დავეხმაროთ და მეორე ნაწილს ხელი შევუშალოთ“-აღნიშნა გიორგი თოდუამ. როგორც თოდუამ რადიო „ათინათს“ განუცხადა,აღნიშნულ პრობლემაზე იგი შპს „საქართველოს გაერთიანებული წყალმომარაგების კომპანიის" ზუგდიდის სერვისცენტრის ხელმძღვანელს დავით ფოცხვერიას ესაუბრა და მისგანაც მიიღო პირობა, რომ მილების შეერთებამდე თეთრი გიორგის ქუჩაზე არსებული პრობლემა მოგვარდება. თავის მხრივ რიგის ქუჩის მაცხოვრებლები საკანალიზაციო მილის გაყვანას ითხოვენ, როგორც ისინი აცხადებენ მათ დაპირება მიიღეს, რომ 2 თვეში მათ ქუჩაზე ახალი საკანალიზაციო მილი იქნება.