ზუგდიდში დევნილები, რომელებსაც თაბუკაშვილის ქუჩაზე მშენებარე კორპუსებში საცხოვრებელი ფართის მიღება სურთ, რეგისტრაციის პროცესით უკმაყოფილოები არიან. „ვითხოვთ უფრო მეტი ოპერატორი იყოს და უფრო მეტი ხალხი მიიღონ. ბავშვები და მოხუცები ვდგავართ, აქ ვათენებთ და ვაღამებთ. ხალხიც დამშვიდდება და ამდენი რიგიც არ იქნება“, - ამბობს აფხაზეთიდან დევნილი მარგალიტა ჭიჭინაძე. ამასთან, დევნილები რეგისტრაციის დასრულების თარიღის გადავადებას ითხოვენ, რადგან შიშობენ, რომ  ისინი დათქმულ ვადებში  რეგისტრაციის გავლას ვერ მოასწრებენ. აჭარისა და სამეგრელო-ზემო სვანეთის ლტოლვილთა სამმართველოს უფროსის მოვალეობის შემსრულებელი მალხაზ ჟვანია ამბობს, რომ რეგისტრაციის პროცესს თავად დევნილები აფერხებენ, რადგან ისინი რიგს ვერ აკონტროლებენ. მისივე თქმით, რეგისტრაციის დასრულების თარიღმა ერთი კვირით გადაიწია და ის 30 ივნისს არ დასრულდება. „მინდა აღვნიშნო, რომ თაბუკაშვილის ქუჩაზე მშენებარე კორპუსებში საცხოვრებელი ფართის მისაღებად არსებობს კრიტერიუმები, რომელთა მიხედვით პირველ რიგში დაკმაყოფილდებიან შემდეგი კატეგორიის დევნილები" შეზღუდული შესაძლებლობის მქონე პირები, ომის ვეტერანები,  სოციალურად დაუცველები და სხვ.  ამის შესახებ დევნილებმა იციან, თუმცა მათ ამის გაგონებაც არ უნდათ და კითხვარებს ავსებს ყველა“, - ამბობს მალხაზ ჟვანია. ზუგდიდში, თაბუკაშვილის ქუჩაზე დევნილთა კორპუსების მშენებლობა 2014 წლის სექტემბერში დასრულდება და საცხოვრებელ ფართს 256 დევნილი ოჯახი მიიღებს.