მაჯორიტარი დეპუტატობის დამოუკიდებელმა კანდიდატმა ვლადიმერ ვახანიამ  ხალხთან შეხვედრა საკუთარი საცხოვრებელი სახლის წინ გამართა. „მე მივმართავ „ქართულ ოცნებას“, პირადად ბიძინა ივანიშვილს და ირაკლი ალასანიას, დამიჭირონ მხარი. იმ შემთხვევაში თუ ირაკლი ალასანია მოხსნის საკუთარ კანდიდატურას მაშინ ჩვენ ორივე დიდი ალბათობით შევდივართ პარლამენტში“- ასეთი განცხადებით წარსდგა ყოფილი პოლიტპატიმარი ვლადიმერ ვახანია მასთან შესახვედრად მოსული საზოგადოების წინაშე. ვლადიმერ ვახანიამ აღნიშნა, რომ საკუთარ თავზე გამოსცადა საკაშვილის რეჟიმის სისასტიკე. მან ასევე ყურადღება გაამახვილა წინასაარჩევნო გარემოზე. „ახლანდელ ვითარებაში ძირითადად  ორი ძალა არსებობს. წარსული პარტია ეს არის მიხეილ სააკაშვილის ნაცისტური პარტია და ახალი ძალა, რომელსაც რეალურად შეუძლია წინააღმდეგობა გაუწიოს დღევანდელ ხელმძღვანელს ეს არის „ქართული ოცნება“. მე მხარს ვუჭერ ქართულ ოცნებას. ვფიქრობ, რომ ბიძინა ივანიშვილის ხელმძღვანელობით ჩვენ უნდა მივაღწიოთ გამარჯვებას. სააკაშვილი დამარცხებულია, საქართველოს პრეზიდენტს და მთავრობას ხმების მოპოვების ერთადერთი საშუალება აქვთ, ეს არის არჩევნების გაყალბება. მე ვადანაშაულებ როლან ახალაიას და მთელს მის ოჯახს იმ უსინდისობაში რაც მათ ჩაიდინეს სამეგრელოში და საქართველოში. ვფიქრობ რომ ჩემი სახით ქართულ ოცნებას მიემატება დიდი ძალა. მე წარმოვადგენ საქართველოში მყოფი ყველა პოლიტპატიმრის სახეს“ - განაცხადა ვლადიმერ ვახანიამ. შეგახსენებთ, ვლადიმერ ვახანია, პარტია „მთლიანი საქართველოს" დამფუძნებელია. მან ზუგდიდის მაჟორიტარი დეპუტატობის პოსტზე საკუთარი კანდიდატურა პატიმრობაში ყოფნის პერიოდშივე დაასახელა. ვლადიმერ ვახანია სამართალდამცავებმა 2009 წელს დააკავეს და ჟურნალისტისთვის პროფესიულ საქმიანობაში უკანონოდ ხელის შეშლის ბრალდებით გაასამართლეს.