საქართველოს ადგილობრივი თვითმმართველობის ეროვნული ასოციაცია ფოთის მერის დანიშვნის პროცედურებში "ეკა ბესელიას ჩარევის გამო" შეშფოთებას გამოთქვამს. ასოციაციის განცხადებაშია ნათქვამია, რომ საქართველოს პარლამენტის დეპუტატმა, ფრაქცია "ქართული ოცნების" წევრმა ეკა ბესელიამ,  ფოთის საკრებულოს თავმჯდომარისგან ფოთის მერის თანამდებობაზე "ქართული ოცნების" წარმომადგენლის დანიშვნა მოითხოვა. "იგი ასევე მიუთითებდა ქალაქის თვითმმართველი ერთეულების ხელმძღვანელობას, როგორ უნდა ჩაეტარებინათ მათ ქალაქის მერის დანიშვნის პროცედურები. საქართველოს ადგილობრივი თვითმმართველობის ეროვნული ასოციაცია გამოთქვამს უკიდურეს შეშფოთებას მომხდარის მიმართ, ფაქტს მიიჩნევს ცენტრალური ხელისუფლების თანამდებობის პირის მიერ ადგილობრივი თვითმმართველობის ექსკლუზიურ კომპეტენციებში პირდაპირ და უხეშ ჩარევად, რაც წარმოადგენს ადგილობრივი თვითმმართველობის ევროპული ქარტიის, საქართველოს კონსტიტუციისა და საქართველოს ორგანული კანონის თვითმმართველობების შესახებ უხეშ დარღვევას. ადგილობრივი თვითმმართველობის ეროვნული ასოციაცია მიმართავს საქართველოს პარლამენტის ხელმძღვანელობას, აღკვეთოს საქართველოს პარლამენტის წევრების ჩარევა ადგილობრივი თვითმმართველობის ექსკლუზიურ უფლებებში."ქართულ ოცნებას” ჰყავს შესაბამისი წარმომადგენლობა ფოთის საკრებულოში, რათა ადგილზე გადაწყდეს ყველა არსებული საკამათო საკითხი თუ პრობლემა", - ნათქვამი მიმართვაში, რომელსაც ხელს ასოციაციის პრეზიდენტი მამუკა აბულაძე აწერს. ეკა ბესელია  ქალაქის მერის არჩევის საკითხის განსახილველად ადგილობრივი საკრებულოს წარმომადგენლებს გუშინ შეხვდა. როგორც მან  განაცხადა მისი პრინციპული მოთხოვნაა, რომ საკრებულომ თვითნებურად, ხალხის ნების გარეშე არ დანიშნოს "ნაციონალი" მერი. ფოთის მერის თანამდებობაზე "ქართული ოცნების" წარმომადგენლის, დავით სარსანიას დანიშვნის მოთხოვნით, ფოთის მერიის წინ რამდენიმე ათეული ადამიანი იყო შეკრებილი.