ზუგდიდის ყოფილი პოლიტექნიკური კოლეჯის შენობაში მცხოვრებმა დევნილების ოცმა ოჯახმა პოლიციის სამმართველოს წარმომადგენლებისგან კორპუსის დატოვების შესახებ გაფრთხილება მიიღო. დევნილებმა რადიო "ათინათთან" საუბარში აღნიშნეს, რომ ეს პირველი გაფრთხილება არ არის. გასულ თვეს პოლიციამ შენობის მაცხოვრებლებს რამდენჯერმე შეახსენა, რომ უახლოეს მომავალში ალტერნატიული ფართის ძიება მოუწევთ. დევნილების განცხადებით 10 დეკემბერს მათ სამეგრელოს დევნილთა სამმართველოს მთავარმა სპეციალისტმა გოჩა ელერჯიამ მიაკითხა და განუცხადა, რომ დევნილები შენობაში მხოლოდ 29 მარტამდე დარჩებიან. ამ ხნის განმავლობაში კი სამმართველოს მხრიდან შეთავაზებები იქნება შეიმუშავებული. სამმართველოს მიერ შეთავაზებულ წინადადებას, დევნილთა ოჯახების მხოლოდ ნაწილი ეთანხმება. ლტოლვილთა და განსახლების აჭარა, სამეგრელო– ზემო სვანეთის სამმართველოს უფროსმა ლევან მიქვამ რადიო „ათინათთან“ საუბარში განაცხადა, რომ მათ დევნილებს შესთავაზეს ალტერნატიული ფართი ჩხოროწყუს რაიონში, სოფელ ზუმში და აგრეთვე ზუგდიდის სხვადასხვა სოფლებში, თუმცა ისინი საცხოვრებელ ფართს ზუგდიდში ითხოვენ.