საჯარო შეხვედრა დემოკრატიული ჩართულობის ცენტრში, კონსტიტუციაში ახლად წარმოდგენილ ცვლილებებზე საქართველოს პარლამენტის უმრავლესობისა და ოპოზიციის წევრებმა შეხვედრა გამართეს. საპარლამენტო უმცირესობის წევრებს, აკაკი ბობოხიძეს, აკაკი მინაშვილს, ნუგზარ წიკლაურს და მარიამ საჯაიას საზოგადოების ნაწილი, ცოცხებითა და შეძახილებით შეხვდა. პარლამენტარ აკაკი ბობოხიძის სიტყვით გამოსვლა აუდიტორიამ რამდენჯერმე შეაწყვეტინა. განსაკუთრებული გაღიზიანება გამოიწვია ბობოხიძის მიერ წარმოთქმულმა სიტყვებმა: „დასავლეთ საქართველო დაცლილია“ რის შემდეგაც საზოგადოების მხრიდან შეურაცხმყოფელი შეძახილები გაისმა.  საზოგადოების ნაწილის პროტესტის ფონზე ბობოხიძემ და მარიამ საჯაიამ დარბაზი დატოვეს. მდგომარეობის განმუხტვას ცდილობდნენ, ზაქარია ქუცნაშვილი და ზვიად ძიძიგური. „ქართული ოცნების“ წევრმა, ვახტანგ ხმალაძემ პარლამენტის თბილისში გადატანის აუცილებლობაზე და მის ეკონომიკურად დადებით მხარეებზე ისაუბრა. მისივე თქმით 20 მილიონზე ნაკლები დასჭირდება პარლამენტის თბილისში გადატანას. მოგვიანებით აკაკი ბობოხიძემ მედიასთან საუბარში განაცხადა, რომ მისი ფუნქცია და როლი ამ შეხვედრაზე ამოწურულია და მიაჩნია რომ ამ რეჟიმში მუშაობა შეუძლებელია. ბობოხიძემ იმედი გამოთქვა, რომ  მსგავსი შეხვედრები სხვა რეგიონებში მეტად ორგანიზებული იქნება. კონსტიტუციაში ახლად შესატანი ცვლილებების საფუძველძე კანონით არ განისაზღვრება პარლამენტის ადგილმდებარეობა. პრეზიდენტს შეეზღუდება უფლება–მოსილება და ის ერთპიროვნულად ვერ დაითხოვს მთავრობას და დანიშნავს პრემიერს მინისტრს.