დევნილების განცხადებით მათი თავდაპირველი მოთხოვნა, რეზიდენციის სოციალურად დაუცველების და დევნილების მფლობელობაში გადაცემის შესახებ  შეიცვალა. ამჯერად ისინი  პრეზიდენტის რეზიდენციის, დევნილთა საბავშვო ბაღისთვის დათმობის მოთხოვნით შეიკრიბებიან. „კარვების აქციას“ კიდევ ერთი აფხაზეთიდან დევნილი ოჯახი შეზღუდული შესაძლებლობების მქონე, მცირეწლოვან შვილთან ერთად შეუერთდა.  მოთხოვნის დაკმაყოფილებამდე  კარავში დარჩებიან. როგორც რადიო  „ათინათთან“  საუბარში აფხაზეთიდან დევნილი, რევაზ ღადუა  აცხადებს, ის სამი დღეა თავის მცირეწლოვან შვილებთან ერთად ღამეს კარავში ათევს. ასევე ღადუას თქმით, სანამ არ ექნებათ ნორმალური საცხოვრებელი პირობები და არ დააკმაყოფილებენ  საცხოვრებელი ფართით ისინი დაშლას არ აპირებენ. რადიო „ათინათთან“ საუბარში  დევნილები აღნიშნავენ რომ  მთელი ამ ხნის  მანძილზე  მათ სოლიდარობას    მოქალაქეები და  ზუგდიდში,  „ქართული ოცნების“  წარმომადგენლები უცხადებენ. შეგახსენებთ რომ ზუგდიდში, 21 იანვარს, მოძრაობა“ ქალები მშვიდობისათვის „  ორგანიზებით პრეზიდენტის რეზიდენციის შენობასთან  კარავი გაშალეს. ამ ფორმით აქციის მონაწილეები პრეზიდენტისგან რეზიდენციის სოციალურად დაუცველების და დევნილების მფლობელობაში გადაცემას ითხოვენ. „დაიცავი საქართველოს“ და მოძრაობა „ქალები მშვიდობისთვის“ წარმომადგენლებთან ერთად კარავში ყოფილი პოლიტექნიკური კოლეჯის შენობაში დროებით მცხოვრები დევნილები მოთავსდნენ.